1667/2022-2023

Dated Lunglei the 20th August, 2022: Zan khat riaka Lunglei lo zin Dr. Renu Sharma, IAS, Chief  Secretary to the Government of Mizoram chuan vawiin khan DC Conference Hall ah Lunglei District Head of Offices te inkawmhona a neih pui. Chief Secretary hian Civil Hospital Lunglei, Anganwadi, AH&Vety leh Fisheries hmunhma te a tlawh bawk.

Dr Renu Sharma chuan mahni Department chan theuh fimkhur leh taima taka enkawltu Head of Office-te chungah lawmthu sawiin Department hrang hrang ten thawhhona tha tak nen hma an la tlang thin chu lawmawm a tih thu a sawi a. Head of Office kalkhawmte chu District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel tur in a chah a. Office kal hun timing vawng uluka discipline tha taka kengkawh tur leh an thawh chhan mipuite tana dawr nuam taka awm turin a chah a. An project leh scheme enkawlah te harsatna tawh chang te pawh a awm thei tih a hriatpui thu leh heng harsatna a thlenin sawrkar hotute hnenah thlen hreh lo turin a chah bawk a ni.

Meeting-ah hian Lunglei Deputy Commissioner Pu Kulothungan A chuan Lunglei District dinhmun tlangpui leh sawrkar hmalakna langsar zualte sawiin Presentation hun a hmang a. Lunglei District-ah Covid-19 do let nan CSR tanpuina cheng nuai 200 man hu chuang leh ambulance pathum (3) dawn te; zirlai harsa mi 46 tan smartphone a thlawna pek te; ‘BALA (Building as Learning Aid) Anganwadi Centre panga (5) siam anih thu te leh ‘Go To The People Project’ kaltlanga thingtlang khaw kilkhawr zawka cheng te tan an khua ah ngei sawrkar service-te chhawpchhuah sak thin an nih thu te a tarlang a. Hemi bakah hian Department hrang hrang hmalakna lian tham – tui hna humhalhna Amrit Sarovar; thingtlang kawng siam Pradhan Mantri Gram Sadak Yojana (PMGSY); thingtlang in tina tui connection pek chhuah Jal Jeevan Mission; bawlhhlawh sawngbawlna Solid Waste Management Centre sak mek; Zopuitlang, Theiriata Radar Station siam; Lunglei Municipal Council kalpui dan tur leh ni zung chakna hmanga power siam chhuah chungchang te chipchiar taka ngaihtuah ho a ni a. NH-302 Tlabung kawng laih meka kawng chhe nasa chu veiawm a tih takzet thu sawiin Chief Secretary chuah Lunglei DC chu helai contractor te meeting lo neihpui leh vat turin chah bawk a ni.

Lunglei SP Pu Rex Zarzoliana Vanchhawng pawhin thu sawiin Lunglei District ah dan leh thupek kenkawh kawngah harsatna liantham a awmloh thu leh District ralmuang tak anih thu a report a. Lunglei District huamchhunga international boundary Indo-Bangladesh border 107 kms a thui venghimtu BSF-te pawhin tha taka hna an thawh thu sawiin he boroder kaltlanga mihring leh damdawi te tawlh ruk palh thleng thei veng turin police leh BSF-ten uluk taka joint patrolling an neih thin thu a report a ni.

Chief Secretary hian Hatchery cum poultry farm, Lungpuizawl, Government Fish Seed Farm, Zobawk, Civil Hospital Lunglei leh BaLA (Building as Learning Aid) Anganwadi, Pukpui te tlawhin chawhnu lamah Aizawl lam panin a haw leh nghal a ni.

Attachment

  • Loading attachment...