Vawiin khan Khelo India Competition 2016-17 for Lawngtlai District chu District Sports Centre, Electric Veng, Lawngtlaiah Lawngtlai DC Dr A. Muthamma IAS, Khelo India Committee Lawngtlai District-a Chairman ni bawk chuan a hawng.

Dr A. Muthamma chuan Khelo India chu District chhunga infiam mite'n tangkai takin hmang se a duh thu a sawi a. Chak chang leh chak loh chang nei thin an nih avanga harsatna hrang hrang hmachhawn dan an thiam bikna leh rilru hrisel an neih chu mi pangngai aia infiam mite an vanneih zawkna a ni tiin, an theihna leh thiamna te chher hriama hma lam pan zel turin infiam mi kal khawmte chu a fuih a ni.

Lawngtlai District tana Khelo India hawnna hun hi District level Committee Co-Chairman Pu C.Hrangthianga chuan a kaihruai a. Secretary Pu C.Lalhmangaihkima hnen atangin report tlangpui ngaihthlak a ni bawk.

Tun tuma intihsiakna buatsaih hi a tum khatna a ni a. Kum 17 hnuai lam tan discipline paruk - athletics, badminton, boxing, football, table tennis leh taekwondo-ah te intihsiakna buatsaih niin, heta pakhatna theuh hian December ni 15 & 16 hian Aizawlah state level competition an hmachhawn leh dawn a ni.