Kum tin rampuma sipaite puala Ni hman thin ‘Armed Forces Flag Day’ chu Mizoramah pawh vawiin khan hman a ni a. He Ni puala Mizoram Governor Lt Gen Nirbhay Sharma, PVSM, UYSM, AVSM, VSM, (Retd) thuchah chu media hrang hrang kaltlangin mipuite hnenah puanzar a ni.

Mizoram mipuite hnena a thuchahah Mizoram Larsap chuan chawl lova ram venhimna hna thawk mek armed forces peng pathum - army, navy leh air force - a tanglai sipaite bakah ex-servicemen leh ram tana nunna chan ta siapi huaisen engemawzatte hriatrengna Ni-ah hian mipuiten an laka kan bat hre renga, he Ni puala flag, badge leh thildang hralha tanpuina thawhlawm khawn thin chu mipuiten theihtawpa thlawp turin a ngen. Vawiin khan Ex-servicemen leh NSS ten sorkar pisa, dawr, mimal leh khawlaiah Armed Force Flag Day puala siam flag, badge leh thildangte an zuar a, Mizoram Governor pawh a chenna Raj Bhawan-ah rawn tlawhin Gorvenor Pu Nirbhay Sharma chuan an thil zuarte a lo chansakin armed forces pualin thawhlawm a thawh ve a ni.

Armed Forces Flag Day 2016 puala Mizoram Governor Thuchah :

Kan hriat theuh angin, kum tin December ni 7 hi ‘Armed Forces Flay Day’ puala hman thin a ni a. He Ni hi kan ram vengtu sipai huaisen te hriatrengna Ni a ni a, nunna chan ta sipai huaisente kan hriatrengna Ni a ni. Sipaite hi kan ram venghimtu an ni a, kan ram leilung, tuipui te leh van boruak thleng min venhim saktute an ni – sik leh sa, khaw vawt leh riltam sawi lovin darkar tin ram venhim hna an thawk a ni. ‘Armed Forces Day’-ah hian heng kan sipai huaisen – army, navy leh air force - te laka ram mipui zawng zawng ten kan bat kan hriatchhuah a, kan tana an nunna an hlan avanga chhungkaw tam takin chhungkaw pa an chan phah a, fapa leh unaupa an chan tih I hre reng ang u.

Armed Forces Day kan hmanna chhan 3 a awm a, chung chu :

1. Indonaa inhliam sipaiten nunphung pangngai an awh neih leh theih nana tanpui

2. Ex-servicemen leh an chhungte hamthatna phuhruk sak an nih theih nan

3. Sipai tang lai leh an chhungten kawng hrang hranga hamthatna an neih theih nan.

Flag Day hian sipai nunna chan ten an kalsan an nupui hmeithai ta te, indonaa inhliam sipai te leh anmahni chunga innghat thin an chhungkuate lakah bat lian tak kan nei tih min hriatchhuah tir a. He Ni pual hian mipui atangin thawhlawm khawnin ‘flag’ leh ‘badges’ te zawrh a ni thin a. Kan sipai huaisen te leh chhungkua te lakah mitinin kan mawhphurhna I hre theuh ang u.

He hunah hian Mizoram mipuite hnena ka sawi duh chu : kum tam tak chhung chu Mizoram hian armed forces-tan a thawh hlawk thin hle a. He state atanga sipaia tang, mi huaisen leh chawimawi tlak engemawzat an awm a, rampum leh Mizoram state an tihmingtha hle a ni.

Mizoram chief Minister lo ni tawh pathumte chu defence officer pension te an ni nghe nghe a. Mizoram Chief Minister hmasa ber Ex-Seaman Ch.Chhunga (L), Brig. T.Sailo (L) leh Ex-Hav. Laldenga (L) te. Anni bakah hian MLA 4 lai chu sipaia tang thin an ni bawk a, chungte chu – Ex.Jem. J.Lalsangzuala (L), Col LC Sailo, SM leh tuna Parliamentary Secretary 2 (pahnih) ni mek - Lt Col ZS Zuala leh Capt Hmingdailova Khiangte te an ni.

He state hotuber leh kum lama Upa ka nihna angin Mizo thalai – mipa leh hmeichhia – te fuih ka duhna chu kan sawi tak mi hmingtha leh entawntlakte hnung zui in tum tur a ni. Mizo thalaite a tam thei ang ber armed forces-a lut turin, tihtakzeta inbuatsaih turin ka chah duh a, armed forces peng hrang hrang-ah a hniam ber atanga a hotu ber nihna an thleng thei a ni tih ka ring tlat a ni. Mizo hnamzia ka en hian armed forces-ah an lut a nih chuan an thawhpuite tan pawha entawntlak leh chawimawi tlak khawpa hlawhtling thei an ni tih ka chiang hle a ni.

Kum dang ang bawkin kuminah pawh Flag Day pual hian Mizoram pumah thawhlawm khawn a ni leh dawn a. Mipui zawng zawng, khawtlang leh sumdawngte, sorkar hnathawk leh mitin te hnenah mahni phal ang tawk thawh theuh turin ka ngen duh a. Kan tana nunna thap leh chant a te kan zahna leh kan chawimawina, an tana kan tih ve theih tawk a ni tih hriain theihtawp I chhuah sak ang u.

Awle, Kohima War Cemetery-a thuziak lar tak hian ka thusawi ka ti tawp duh a : “ When you go home, tell them of us and say, for your tomorrow, we gave our today.” – he thu hi 480 BC-a Battle of Thermopylae-a nunna chant a Spartan mi huaisente hriatreng nana phuah a ni nghe nghe.