2619/2024-2025

Dated Lawngtlai, 21st October 2024 : Vawiin chhun  dar 12 khan kumin Krismas leh Kum thar vuakveta mipuiten ralmuang leh him zawka  hunpui  an hman  theih nan puak thei thil Halpuah, Halmawi leh a kaihhnawih chi hrang hrang khapna siam leh  kenkawh dan tur relin DC  Conference Hall-ah thutkhawmna neih a ni a. Pu Zoramsiama Hmar, Addl. DC chuan he hun hi a kaihruai.

Pu  Zoramsiama Hmar chuan Krismas leh Kum thar vuakvetah Halpuah leh a kaihhnawih hal lo turin sawrkarin thuchhuah a siam thin a; heihi mipui vangtlang him zawkna  tur a ni a, mipuite pawhin tha taka zawm a tul hle a ti.  Heng halmawi leh puak thei thil hian mihring hriselna nasa takin a nghawng thin a, a bik takin lung tha lo leh kum lama upa zawkte tan a pawi thui em em ani, a ti. Kum dang aia hmaa Halpuah leh a kaihhnawih khapna chungchang rel a nih chhan chu mipuite hnenah a hma lama puanzar a,  sumdawngte pawhin a hma lama an lo hriat leh a lakluh bakah zuar chhuak  an awm loh nan a  nih thu  sawi a. Halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order) chhuah a nih huna tha taka zawm tura Lawngtlai mipuite sawmin, Kohhran leh Tlawmngai pawl hrang hrangte thawhpuina leh tawiawmna tha a ngen nghal bawk.

Pu Tlualaisa Hlychho, Addl. SP chuan  nikum Krismas leh Kum thar lawmnaah Lawngtlaiah Halpuah leh Halmawi hal an tam loh thu sawiin, veng pahnih velah chauh hal awm nia thu an dawn thu a sawi a. Kumin Krismas leh Kum thar lawmnaah khauh zawka dan leh thupek kengkawh a hmalak  a nih tur thu a tarlang.

Kumin  Krismas leh Kumthar vuakveta mipui ten ralmuang leh him zawka  hunpui an hman  theih nan a  puak thei thil Halpuah, Halmawi leh a kaihhnawih chi hrang hrang khapna siam leh  kenkawh dan tur rela thutkhawmah hian thu pawimawh tak tak rel a ni a.  District Magistrate atangin Halmawi leh a kaihhnawh chi hrang hrang, naupang silai lem (a mu kapchhuak thei) lakluh, hralhchhuah, kawl leh hman khapna thupek (prohibitory order)a hma lama  siam a, Diwali  huam tir ngei bakah a  tul dan anga pawhsei ni se an ti a. Veng tina YLA Information Mike kaltlangin mipui hnenah puanzar ni se tih niin, Tlawmngai Pawl  'duty' thin pawh chhunzawm tura hmalak nise tih a ni a. Lawngtlai huamchhunga 'Entry Point' ah Police duty tir ni se, Magistrate leh Police tankawp ten dawrkai zingah halpuah leh a kaihhnawih thil zuar an awm leh awm loh endikna nei se an ti a. SDO (Civil) leh BDO ten an huamchhungah theuh a tul dan angin  hma lo la se tih a ni a, Kohhran tina puangzar turin Secretary theuh  hnenah lehkha siam a pek nise an ti, a ni.

MJA Lawngtlai District hnenah Halpuah, Halmawi leh a kaihhnawih that lohna a zau thei ang bera puangzar tura ngenna siam ni se, Lawngtlai district - a 'youtuber' te hnenah  an channel kaltlanga puangzar tura hmalak ni bawk se an ti a. LWA leh MHIP ten an  Branch theuhah hma la turin ngenna lo siam se tiin, DIPRO in Halpuah, Halmawi leh a kaihhnawih that loh zia inzirtirna video tawi lo siam se tih a ni bawk.

Vawiin thutkhawmah hian Pu Tlualaisa Hlychho, Addl. SP, Pu Collin Hlychho, BDO Lawngtlai, Pu Gilbert Lalhlimpuia, BDO Bungtlang 'S', Dr. Saithantluangi Zote, SDC, Pu Zonunchama Ralte, DIPRO bakah MUP, MHIP, LWA leh Kohhran aiawhte an tel thei a ni.