2618/2024-2025
2024 Khuangchawi thla ni 21: Vawiin khan Lungleia kum 2024 Krismas leh 2025 Kumthar vuakveta boruak muanawm tak a awm theih nana hma lak dan tur hrang hrang ngaihtuahin sawrkar official-te leh pawl hrang hrang ai awhte chu Lunglei District Bawrhsap Pu R. Lalṭhazuala hovin Lunglei DC Conference Hall-ah an ṭhu khawm.
He hunah hian boruak muanawm tak hnuaia Krismas leh Kumthar hman a nih theih dan tur ngaihtuah ho niin, harsatna hrang hrang thleng thei laka inven dan tur sawi ho a ni a. Hunpui vuakveta boruak muanawm a awm theih nana police leh YMA/VDP te hma lak ṭhin dan chhuanawm takte tar lan niin, kumin hunpui vuakvetah pawh theih tawp chhuaha hma la leh tura beisei leh ngen an ni a. Khawtlang ralmuan zawk nana hunpui vuakveta duty post siam chungchang te; halpuah, halmawi, sky lantern leh silai lem (plastic mu kap chhuak thei chi) khapna kenkawh mek kenkawh zui zel dan tur te; zu leh ruihhlo lak luh/phurh chhuah/hman sual a nih loh nana hma lak dan tur leh hunpui vuakveta bazar ruahmanna leh lirthei veivah dan tur chungchang te sawi ho a ni a. Ruahmanna hrang hrang a hlawhtlin theih nan a ṭul ang zelin District thuneitute, LMC, police, excise, department hrang hrang leh tlawmngai pawlte nen inrawn tlanga hma lak ni se, tih a ni.
Krismas leh Kumthar vuakvetah hian Lunglei District chhungah ruihtheihthil leh puak thei lam chi hman leh hal khap niin, khauh taka kenkawh tum a ni a. Sualna hrang hrang do tur leh boruak muanawm tak a awm theih nan police leh tlawmngai pawlte chu ralvengin an awm dawn a, dan bawhchhia an awm chuan dan anga hrem zel an ni ang.
Hunpui laia boruak muanawm a awm theih nana ruahmanna hrang hrangte ṭha taka zawm a, thuneitute thawhpui turin District level committee chuan Lunglei District mipuite a ngen a ni.
Attachment
- Loading attachment...
