Vawiin khan Lawngtlaia Krismas leh Kumthar atana inbuatsaih dan tur hrang hrang ngaihtuahin sawrkar leh tlawmngai pawl ai awhte chu Lawngtlai DC Dr Arun T., IAS hovin Lawngtlai DC Conference Hall-ah an thu khawm.

He hunah hian boruak muanawm tak hnuaia Krismas leh Kumthar hman a nih theih dan tur ngaihtuah ho niin, harsatna hrang hrang thleng thei laka inven dan tur sawi ho a ni a. Hunpui vuakveta boruak muanawm a awm theih nana tlawmngai pawlte hma lak thinna chhuanawm takte tarlan niin, kumin pawh hian hma la leh tura beisei leh ngen an ni a. District thuneitute, LADC lam, Police leh tlawmngai pawlte nen inrawn tlanga hma lak ni se, tih a ni.

Krismas leh Kumthar vuakvetah hian Lawngtlai District chhungah chuan ruihtheihthil leh puak thei lam chi hman leh hal khap a ni a. Sualna hrang hrang do tur leh boruak muanawm tak a awm theih nan Police leh tlawmngai pawlte chu ralvengin an awm dawn a, dan bawhchhia an awm chuan dan anga hrem zel an ni ang.

He hunah hian kum 2018 Republic Day hman dan tur pawh rel nghal a ni a. Republic Day 2018 lawmna hi Lawngtlai Vengpui field-ah chawhma dar 10:30-ah hman ni se, kum dang ang bawkin parade contingent – armed, unarmed, school leh band party awm lehin, endiktu leh a ti thate hnenah lawmman pawh pek leh ni se, tih a ni.

He meeting-ah hian Republic Day lawmna tura thil pawimawh hrang hrang sawi ho niin, department leh tlawmngai pawl hrang hrangte hnenah mawhphurhna sem rual a ni a. A ni-ah hian sawrkar office, zirna in leh sawrkar quarters-ah te hnam puanzar zar vek tura tih a ni a. Chhawmdawlna in thlan bikte hnenah tanpuina thilpek pek leh ni se, tih a ni bawk.

Attachment

  • Loading attachment...