Ni hnih awh tur Village Council Conference cum Panchayat Sammelan chu vawiin chawhma dar 11 khan Champhai Town Hall-ah tan a  ni a. He hunah hian Champhai North bialtu MLA Pu TT Zothansanga chu khuallian a ni. Panchayat Sammelan puala VC hnuaia  hnathawh tarlanna thlalak en theih turin a hawng  nghal a ni.

Kuallian chuan VC member kalkhawmte chu khawtlanga mawhphurhna sang tak nei an nih thu leh khawtlang tana thahnemngai tak, midangte tana hnathawk thin an nih thu a sawi a. Phut let awm lova khawtlang hmasawnna atana an hnathawhah lawmthu a sawi a, sawrkar pawhin VC-te hmakhua ngaiin ngaihtuahna a seng zel dawn a ni, a ti a. Panchayat Raj chu India dan puiin State tina din tura a tih anih thu sawiin Mizoramah pawh kalpui tum a ni a, amaherawhchu thil siam rem leh zir chian ngaite a la awm avangin din ni rih lo mahse chak taka hmalak mek zel anih thu a sawi a. VC member te chu khawtlang mamawhte a thlenna tur department leh hotute hnena thlen thin turin a chah a. Bengvar nan leh hnathawh awlsam zawk nan Training-te kal zel turin a chah bawk a ni. Eirukna chungchangah VC te an fihlim thin chu fakawm tiin eirukna laka fihlim tur chuan a te ber atanga a lian ber thlenga mahnai theih ang tawk theuha kan rinawma kan do tlat a ngai a ni, a ti a. Khawtlang hmasawnna leh vawn him kawngah VC , sawrkar leh mipuite thawhho tlat a ngaih thu a sawi a. Pu TT Zothansanga chuan zirna lama nasa zawka tan lak angaih thu sawiin VC te pawhin mahni bial theuha zirna lam uar thei tura thangthar te an zirtir angaih thu sawiin a bik takin hemi lamah hian Champhai District mipuite kan than harh a hun tawh tak zet a ni, a ti a. Champhai mipuite mamawh tak Auditorium changtlung tak mi 1500 vel leng tur pawh sak anih thuai theih nan hmalak anih thu a sawi a. SIRD&PR buatsaiha Training VC te tana siam a ni chu lawmawm a tiin nakin zel atan pawha zawngchhang tlak tak a ni, a ti a. Training chhim tur a kalkhawm VC Member-te chu hlawkpui nana hmang theuh turin duhsakna a hlan nghal a ni.

He hunah hian Pi Maria CT Zuali, Director SIRD&PR pawhin thu sawiin  Village council member-te tana training leh Panchayat Sammelan chu Mizoram District hrang hrangahte neih anih thu a sawi a.Central sawrkar pawhin Panchayat Raj din hi a ngai pawimawh a, hemi atan pawh hian Ministry of Panchayat Raj kaltlangin sum cheng vaibelchhe 11 chuang a rawn pek thu a sawi a. Mizoramah Panchayat Raj din a nih theih nan hmalak mek zel anih thu leh hemi atan hian zirchianna state dangah te neih a ni tawh a, VC memberte  pawh zirchiang tura state danga intirh anih tur thu a sawi bawk a. Champhaiah pawh District Panchayat Raj Resource Centre sak mek anih thu leh kum thar lama hawn anih tur thu a sawi a. Mizoramah Panchayat Raj kan hman loh avangin Finance Commission atang sum lokal cheng nuai 20,000 lai kan chan thin a ni, a ti a. Hmasawnna ruhrel siam kawngah huan lo ram siamah tan lak nise, rilru leh thinlung thlenga cham tur hmasawnna siam chu thil pawimawh tak a ni a ti a. Training buatsaih anih theih nana DC leh a thawhpuite inpeknaah lawmthu a sawi bawk a ni.

Champhai Dsitrict chhunga VC 108  awm zinga hnathawk tha zual thlanchhuah pathumte hnenah lawmman trophy leh pawisa fai khuallianin a hlan a. VC tha ber chu Biate niin,  Pawlrang leh Samthang ten an dawt  ve leh a ni. Heng bakah hian SIRD &PR bultumin Computer full set 11 Champhai District chhunga   VC thlanchhuah 11 te hnenah khuallian in a hlan nghal bawk a ni.

 Vawiin VC Conference cum Panchayat Sammelan hawnna programme hi Champha District Bawrhsap Pu Vanlalngahsaka, IAS chuan kaihruaiin kalkhawmte lawmna thu a sawi a. Pu Khawlsiamthanga Khawlhring, Sr. Core Faculty, SIRD&PR-in lawmthu sawiin hun a khar a ni. Chawhnu lamah Technical Session neih niin SIRD&PR, PHE leh Law and Judicial lam atanga mithiam ten zirtirna an pe a ni. Training hi naktuk lamah pawh chhunzawm leh tur a ni.

Vawiin programme-ah hian Department tina Head of Office, DC staff, VC member leh chanchinbumite an tel a ni.