Nimin khan SP Aizawl Conference Hall-ah Superintendent of Police, Aizawl leh a hote chuan kumin 2017 Krismas leh Kumthar hman tura mitinin him tak leh ralmuang taka an hman theihna turin hmalak dan tur an rel.
He meeting hi Aizawl District SP Pu Neihchungnunga,IPS-in a kaihruai a, Addl SP pahnih te bakah SDPO Aizawl North, SDPO Aizawl South leh Aizawl khawpui chhung leh a chhehvela Police Station leh Out-Post Officers in-charge te an tel a ni.
He meeting-ah hian Krismas leh Kumthar boruak muanawm taka awm theihna tura hmalak dan tur sawihovin hengte hi rel a ni :
1. Lirthei veivak, a bikin zanlamah check thin tum a ni a, rui chunga lirthei khalhte chu a na thei ang bera hrem tum a ni. Hemi bakah hian foot patrolling ngawrh taka kalpui tur a ni.
2. Krismas bazar hunlaiin mamawhte tana pan awlsam turin Aizawl bazarpui hmun 3-ah POLICE HELP DESK dah nise.
3. Aizawl khawpui dai kawngpui dungte sawi lawk awm lova check thut thut thin ni rawh se, vantlang hmuna zu in emaw bengchheng siamte chu dan anga na taka hrem tur a ni.
4. Zin mite tan him zawkna a nih theihna turin passenger phur motor leh driver te check thin ni se. Tin, Sumo/Bus Counter te pawh passenger list chiang taka record nei turin hriattir ni rawh se.
5. Halpuah lam chi leh silai lem, a mu kapchhuak thei zuar emaw nei check kalpui mekah case 6 siam ni tawhin mi 8 man an ni tawh a, hei pawh ngawrh taka chhunzawm zel tur a ni.
