101/2022-2023
Ṭau thla ni 8, 2022: Vawiin khan Krishi Vigyan Kendra (KVK), Lawngtlai huaihawtin KVK Training Hall, Chawnhuah National Initiatives on Climate Resilient Agriculture (NICRA) Project hnuaia sik leh sa danglam chho zel mila kut hna thawktute hma lakna her rem chungchang inzirtirna buatsaih a ni.
He hunah hian kut hna thawktu eng emaw zat an tel a. KVK Lawngtlaia Senior Scientist and Head Dr C. Lalfakawma chuan sik leh sa danglam chho zel chu kut hna thawktute'n an tuar lutuk loh nan an hma laknate lo her rem a pawimawh tih a sawi a. Sik leh sa mila kut hna thawktute an inher rem loh chuan harsatna nasa zawk tawk thei an nih avangin National Initiatives on Climate Resilient Agriculture Project chu kut hna thawktute hmakhua su eng tura kalpui tum a nih thu a sawi.
National Initiatives on Climate Resilient Agriculture Project hi kum 5 chhung atan kalpui tur niin, Lawngtlai District chhunga he Project kalpui hmasak berna atan Chawnhu khua thlan a ni a. Khaw dangah pawh hma lak chhoh zel tum a ni.
He Project hnuaia Custom Hiring Centre (CHC) din chu Chawnhu VCP Pu Lalhriatpuia'n a hawng nghal a. Kut hna thawktute tana hawh theih tur hmanrua chi hrang hrang - mini power tiller, brush cutter, tui pump khawl, mini weather station, GPRS, brush cutter tiller attachment leh hmanraw dangte chu he Custom Hiring Centre-ah hian dah a ni. CHC enkawl tur hian Village Climate Resilient Management Committee (VCRMC) din niin, anni kaihhruaina hnuaiah hian a enkawl dan tur felfai tak siama enkawl leh kalpui a ni dawn a ni.
Attachment
- Loading attachment...
