100/2022-2023
Dated Serchhip, the 8th April, 2022: Vawiin khan E. Lungdar Tuipui zauva KVK Serchhip district in Lentil Dal an enchin (pilot project) sengna hun hman a ni a. He hun hi Pu C. Lalrinsanga, Minister, Agriculture, IWRD, Cooperation, etc., chuan a hman pui.

He mi pual inkhawmah Minister hian KVK Serchhip district ten Lentil Dal chin dan lehkhabu (technical bulletin) an buatsaih chu tlangzarhin thusawina hun a hmang zui a. Ka vei em em thin Dal sengna hun duhawm tak an hmang thei leh hlawk takin kan ramah kan thar thei a ni tih kan hmu hian min tilawm em em a, vawiinah chuan enchhin mai kan la ni a, tam thama kan thar theih nan a chin dan chipchiar a bua KVK ten an siam chu lo hmang tangkai turin loneitute a ngen a ni. Dal mai nilovin Alu te pawh chin pun zel tumin hma kan laa, state dang atanga kan lakluh kan tharchhuah ve theih reng site tharchhuah kawngah hma kan la chho zel dawn a ni, a ti. Tuipui Zauva loneituten Custom Hiring Centre hnuaia Tractor an dilna pawh a theih anga a lo ngaihtuah sak tur thu hrilhin, hmun thenkhata Custom Hiring Centre hminga Tractor an pek, mimalin ama hminga Subsidy sum a lo pek avanga mahni mimal ta anga chei zuia, midangte tana hman ve remchang lova siamtute an zawn chhuah vek tur thu leh a tul anga an chunga hmalak zui dan an dap tur thute a tarlang a. Tuipui Zauvin Land Development te, Irrigation te a mamawh hle tih a mit ngeiin a hmuhpui tih hrilhin a tul anga ngaihtuah sak zel a tum thu a sawi bawk. Pu C. Lalrinsanga hian loneituten him taka an thlaite a enkawl theih nan Bio Control Laboratory kan din mek a, leitha lam pawh kan mamawh ang tak kan siam ve theih nan Bio Fertilizer Production Unit kan din mek a ni. Heng sawrkar hmalakna te hi a taka kan hman theih hunah chuan loneituten kan chhawr hle dawn a ni, a ti bawk. Dawn tur awm thei chin dawnga duh tawk mai loneitu ni lova ram tana engemaw thawhchhuah tum tlattu nih tuma, taima taka bei sauh sauh turin mipuite a ngen a ni.

Pu James Lalsiamliana, Director, Agriculture pawhin thusawiin, Agriculture lama tui em em Minister kan neih zarah hmasawnna kan hmu nasaa, vawiina hlawhtling taka kan seng Dal pawh hi ani remhriatna zara kan neih a ni. Tihian kan ei nasat Dal, state pawn atanga kan lakluh deuh vek kha hlawk takin kan thar ve thei reng a ni tih kan hmua loneitu taima leh tumruhte tan zau takin kawng a inhawng ta a ni, a ti a. Theihtawp chhuaha KVK te hmalakna lo thawhpuitu loneitute chungah lawmthu a sawi a ni.

Lentil Dal an chin dan tlangpui hi Pu Kenny Zohmingliana, SMS, KVK in sawifiahna a nei a. Agriculture Minister in enchhin tura min duh angin Dal chi tha, Mizote tana chin tlak tur dapin Dal chi hrang panga chu loneitu tha nia kan hriat, Lungchhuan, Chekawn, N. Vanlaiphai leh E. Lungdar khua atanga thlanchhuahte nena tang hovin kan enchhin a, kan thawhpui loneitute inpeknaah kan lawm hle a ni, a ti. Heng Dal chi hrang hrang kan enchhinah hian IPL 220 Variety hi loneitute chin atan a thar thain a hlawk ber a ni tiin Lentil Dal an chin dan tlangpui hi a sawi a ni. Kum hmasa lama WBL 77 variety an lo chin chhin tawh chu leitha leh a mamawh te pe vekin India ram pum tharchhuah zat chawhrual aia sang zawkin KVK Serchhip hian a lo thar tawh a. Vawiina seng takah erawh hi chuan leitha leh a mamawh dang engmah pe lovin an ching thung a, a tharchhuah pawh tlemin a tlahniam a, national avarage hi a phak lo hlek a ni.

Vawiina an seng tak Dal chingtu Pu C. Biakthansanga pawhin thusawiin, kan ramah hlawk takin dal kan thar ve thei tih kan hmu hi a lawmawm hle a. Buh nen a intibuai bawk si lova, zau tak leh lian tham taka chin theihna E. Lungdar leh a chhehvel khuaah te a awm bawk a. Nasa zawka hmalak chhoh zel a chakawm hle a ni, a ti.

He hun hi Dr. T. Vanlalngurzauva, Sr. Scientist & Head, KVK in a kaihruai a, Pu H. Lalhruaitluanga, BDO, E Lungdar, leh K. Lalngaizuala, VCP E. Lungdar te pawhin thu sawina an nei a ni.

Minister hi Pu James Lalsiamliana, Director, Agriculture Department chuan a tawiawm a ni.