99/2022-2023
Kolasib dated 8th April 2022: Vawiin chawhnu khan Chief Medical Officer, Kolasib pisaah Ministry of Health & Family Welfare ruahmanna a ni 18-22, April, 2022 chhunga Rural Development Block tin a kalpui tur,’Health Mela’ chu Kolasib district chhunga Thingdawl Block leh Bilkhawthlir Block a kalpui dan tur relin Working Committee-te chuan thutkhawmna an nei a. April ni 18 ah Kawnpuiah leh ni 20 ah Vairengtea ‘Health Mela’ kalpuina tur a mawhphurna hrang hrangte enho a ni.

Thutkhawmna kaihruaitu Dr. Lalawmpuia Chhangte, Chief Medical Officer, Kolasib district chuan ‘Health Mela’ kalpui dan tur tlangpui sawi zauna neiin a hlawhtlinna chu a chhimtu a khaw mipuite hlawkpuinaah a innghah thu a sawi a. Chumi tur chuan a buatsaihtute pawhin theihtawp chhuah a mahni hmazawna mawhphurna awmte hlenchhuak theuh turin a ngen bawk a ni. Dr. Lalawmpui Chhangte chuan District Hospital, Kolasiba thiam bikna nei Doctor engemawzah, ni 18 leh ni 20 April 2022 hian ‘Health Mela’-a duty tur a an kalchhuah tur thu a sawi a, dawmdawi a thlawn a sem tur a nih thu leh Digital ID siam a nih tur thu a sawi. CMO chuan mithiamte kaltlangin hriselna kaihhnawih Scheme, Janani Shishu Suraksha Karyakaram (JSSK), Janani Suraksha Yojana (JSY), Mental Health, Family Planning leh thil dangahte rawn theih tur a ruahman a nih thu a tarlang bawk a ni.

‘Health Mela’ hi Kawnpuiah ni 18, April a neih tur a ruahman a nih bakah Vairengteah ni 20-a neih tum a ni bawk a. Hemi ni hian inziahluhna hun hi chawhma dar 9 atanga kalpui tan tur a ni ang a, Digital ID siam nan Aadhaar card ken theuh tur a ni dawn a ni. TB, Non-Communicable Diseases (NCD), HIV leh Malaria endikna hmun a awm dawn a, General Medicine, General Surgeon, Pediatrics, Orthopaedic, Gynea & Obstetric, Opthalmologist, Dental leh Ayush lam a thiamna nei Doctor-te rawn theih turin an duty dawn bawk a ni.