Vawiin khan Krishi Vigyan Kendra (KVK), Lawngtlai District Scientific Advisory Committee (SAC) chu Lawngtlai DC Conference Hall-ah an thu khawm a. Director of Agriculture (Research & Extension) Pu RL Thanzuala leh Deputy Director Pu Zoramthanga te'n hun an hmanpui.

Agriculture (R&E) Director Pu RL Thanzuala chuan KVK chungchang leh an hna thawh dante a sawi fiah a. KVK chu kut hna thawktute puitu, thlai leh ran chi tha leh chin dan tha te, a enkawl dan leh sawngbawl zui dan te kawhhmuhtu an ni, a ti a. Kut hna thawktute'n harsatna hrang hrang an tawhte chu, zir chianga a chhan chhui chhuakin, tih dan tha zawk anmahni ngeiin an enchhin hnuah, a hman tlak dawn chuan kut hna thawktute hnenah an zirtir leh thin thu sawiin, chu'ngte chu kut hna thawktute'n a taka an chhawr theih nan erawh chuan a kaihhnawih department-te'n tha taka an thawhpuina a pawimawh a ni, a ti.

He thut khawmah hian agriculture leh a kaihhnawih department hrang hrang leh NGO thenkhat ai awhte an tel a. Scientist (Home Science) Pi Vanlalruati, i/c Sr Scientist & Head chuan kum 2017-18 chhunga KVK Lawngtlai District hma lakna leh hlawhtlinnate a sawi a. KVK hnuaia subject hrang hranga scientist-te'n kum 2018-19 chhunga Lawngtlai District tana agriculture leh a kaihhnawiha hmasawnna atana zir bingna (research) neih tur an chhawp chhuahte (annual action plan) sawi ho leh thlir ho a ni a. SAC member-te'n thurawn leh ngaihdan an neihte sawiin, Lawngtlai District-in agriculture lama nasa taka hma a sawn theihna tur ngaihtuah a ni a. Scientist (Animal Science) Dr Lalthazuali'n lawm thu sawiin, hun khar a ni.