Vawiin chawhma khan Serchhip Bawrhsap Pi Sangchhin Chinzah chuan Serchhip Hmar venga NBCC in Sport Complex a sak mek chu a tlawh a, Sub-Headquarters YMA hruaituten an tawiawm.

He hna thawktu NBCC Engineer Pu Mithun Das leh a thawhpuiten Pi Sangchhin Chinzah hi lo dawngsawngin tun thla chhunga phul lem phah (Artificial Turf) hna an thawh zawh tur thu an lo hrilh a. Pavilion a thutna tur plastic chair, a hmaa Pi Sangchhin Chinzahin a tlawh tuma siamrem deuh tura a hrilh pawh an siamrem tawh thute, tui paihna tur khawih tha deuh tura a hrilh tawh pawh an lo siam that thute lo hrilhin, chung an hnathawhte chu en ho a ni.

He Complex Phul lem bik hi a dung Meter 105 leh a vang lam Meter 65 a zauva phah tura ruahmanna siam a ni a, tunah hian phul lem phah hna hi thawh mek niin, a sira mipui thutna turte, Pavvilion chhung hnathawh te chu zawh thawkhat tawh a ni. He Complex ah hian Pavilion ah Plastic Chair 1100 vuah niin, a kual chhuakin mipui thutna tur concrete a siam a ni a. Mi 5000 lenna tura ruahman stadium a ni a. Project Cost hi Rs. 10 Crore a nih thu NBCC Engineer Mithun Das hian a sawi.

Grass bak field sir kual hi a hranpa a track siam tumna a awm loh thu NBCC thawktute hian Bawrhsap hi an lo hrilh a, Pi Sangchhin Chinzah chuan hemi chungchang ruahmanna hi UD & PA Department hotute sawipui  a tum thu a sawi a ni.

Bawrhsap Pi Sangchhin Chinzah hi Sub-Headquarters YMA President Pu R. Sanghmingthang leh YMA hruaitu dang Pu C. Vanlalluna, Pu Kapliana Pachuau leh midang ten an tawiawm a ni.

Attachment

  • Loading attachment...