475/2024-2025
2024 Ṭomir thla ni 14: Lai Autonomous District Council (LADC) hnuaia Village Council (VC) Inthlanpui, 2024 buatsaih tur atana hman tur final electoral roll chu vawiin khan Lawngtlai District Election Officer Pu Cheemala Siva Gopal Reddy chuan Lawngtlai DC Conference Hall-ah a tlangzarh a. Hemi rual hian LADC hnuaia 12-Lawngtlai Chandmary MDC biala by-election neih tur atana electoral roll siam ṭhatna behchhana hman tur draft electoral roll chu a tlangzarh nghal bawk a. Electoral roll te hi political party ai awhte hnenah hlan nghal a ni.
Lawngtlai DEO Pu Cheemala Siva Gopal Reddy chuan VC electoral roll felfai leh rin tlak a hun taka tlangzarh theih a ni chu lawmawm a tih thu sawiin, a buaipuitute chungah lawm thu a sawi a. Lawngtlai Chandmary bial MDC by-election atan pawh electoral roll felfai tak a awm theih ngei a beisei thu sawiin, a buaipuitu turte chu theih tawp chhuah turin a chah a. Inthlan thianghlim, felfai leh muanawm tak buatsaih a nih theih nan political party-te leh tlawmngai pawlte thawhpuina a ngen nghal bawk.
He hun hi Deputy DEO Pi B. Malsawmtluangi chuan a kaihruai a. Election Officer Pu Denny Lalchhuanawma chuan VC Inthlanpui buatsaih tur atana electoral roll siam ṭhatna kalpui dan leh final electoral roll dinhmun tlangpui tar langin, Lawngtlai Chandmary bial MDC by-election buatsaih tura draft electoral roll dinhmun leh electoral roll siam ṭhatna kalpui dan tur a sawi fiah bawk.
He hunah hian election official-te, Lawngtlai khawpui chhunga Village Level Officer (VLO)-te leh political party ai awhte an kal khawm a. Inthlan felefai leh muanawm tak buatsaih a nih theih dan tur leh electoral roll dik leh felfai a awm zel theih nana hma lak dan tur rawtna hrang hrang te sawi ho nghal a ni a. VC Inthlanpui lo awm turah felfai zawka vote thlak leh vote chhiar kalpui a nih theih nan VC constituency-a voter 1,000 chuang awmnaah auxiliary polling station dah belh turin State Election Commission (SEC)-ah dilna thlen ni se, tih a ni.
LADC hnuaiah hian VC sawmkua pakua (99) awmin, final electoral roll-a a lan danin, vote nei mipa 27,836 leh hmeichhia 28,685, an zavaiin mi 56,521 an awm a. Draft electoral roll aṭangin voter 2,418 (mipa 1,153 leh hmeichhia 1,265)-in an pung a, a punna hi 4.47% a ni. Vote tam berna 72-Lawngtlai Chandmary VC Constituency-ah voter mipa 1,340 leh hmeichhia 1,483, an zavaiin voter 2,823 an awm a. Vote tlem berna 59-Chamdurtlang-II VC Constituency-ah voter mipa 48 leh hmeichhia 45, an zavaiin voter 93 an awm thung.
12-Lawngtlai Chandmary MDC Constituency chhungah polling station pali (Chandmary North-I, Chandmary North-II, Chandmary South-I leh Chandmary South-II) awmin, draft electoral roll-ah voter 2,823 (mipa 1,340 leh hmeichhia 1,483) an awm a. Vawiina tlangzarh tak draft electoral roll aṭanga paih ngai emaw, belh ngai emaw, siam ṭhat tur emaw neite tan May ni 14, 2024 aṭanga May ni 20, 2024 chhungin claim & objection hun hawn a ni a. India khua leh tui, tribal, April ni 1, 2024-a kum 18 tling chinte chu MDC electoral roll-ah hian thun theih a ni a. Final electoral roll hi May ni 31, 2024-ah tlangzarh tura ruahman a ni.
Attachment
- Loading attachment...
