476/2024-2025

LUNGLEI; the 14th May, 2024: Nimin tlai khan DC Conference Hall, Lungleiah District AIDS Prevention & Control Committee chu Chairman leh Deputy Commissioner ni bawk  Pi Ramdinliani, IAS, kaihhruaiin thutkhawmna neih a ni. Lunglei District a HIV darh zel tur ven dan te, HIV kai awlsam theih dinhmun a awm mek te enkawl dan tur leh zirna in hrang hrang a HIV lak a inven dan tur uar zawk a kalpui dan tur rel a ni.

Pi Ramdinliani chuan natna do tur a pawimawh ber chu a hun taka zirtirna tha pek a nih thu sawiin hemi tuam tur hian Sorkar, tlawmngai pawl leh kohhran leh khawtlang te thawhho a hmalak a ngaih thu a sawi.

Pi Zuiliani Hrahsel, Joint Director (IEC) Mizoram chuan Intensive HIV/AIDS Awareness Campaign in Rural Areas tih thupui hmangin Powerpoint Presentation a pe a, Lunglei District chhung khaw hrang hrang a Awareness Campaign kalpui dan tur te, khaw chhung hmun laili a zirtirna keng thuziak tar dan tur te, Zirna in hrang hrang a Awareness Campaign kalpui dan tur te a tarlang a. District Community Resource Group din dan tur leh Adolescent Education Program kalpui dan tur te sawiho a ni.

Dr. K. Lalhmachhuana, Member Secretary, District AIDS Control Officer, Lunglei chuan report pein District AIDS Prevention & Control Committee, Lunglei chu September 2022 ah din niin Zoram Harh Rawh Campaign, Valentines  Day 2023 hian Blood Donation Camp, Integrated STI, HIV, TB & Hepatitis Campaign, Red Ribbon Quiz Competition , National Voluntary Blood Donation Day 2023, World AIDS Day 2023 leh Adolecent Education Program hman a nih dan te a tarlang a. ICTC & ART chhinchhiah danin Lunglei District chhung ah March 2024 thleng a mi 6966 thisen test atangin mi 127 HIV hmuhchhuah a ni.