477/2024-2025

Aizawl, May ni 14, 2024: Aizawl Municipal Area huam chhunga Ward No. XIX (Corporator ni lai MLA ah a tlin avanga seat pakhat ruak) leh Sakawrtuichhun Local Council (Member ni lai boral avanga seat pakhat ruak) te chu a hnawhkhah nan State Election Commission, Mizoram thuchhuak angin By-Election neih tur a ni a. Hemi inthlanna atan a hman tur AMC/Local Councils Electoral Rolls Summary Revision, 2024 (a tehfung atana 01.04.2024 hmangin) neih niin, roll siamthatna (Revision) neih a nih hnu ah vawiin chawhma khan Aizawl DC Conference Hall ah Final Electoral Rolls tlangzarh a ni. Addl. DC Pi Lalnunmawii chuan party aiawhte leh BLO te hnenah E-Roll copy hi a hlan a ni.

Aizawl Municipal Area huam chhunga Ward No. XIX leh Sakawrtuichhun Local Council Electoral Rolls chu ni 26.04.2024 leh 02.05.2024 chhunga Electoral Roll atanga paih, thun thar, siamthat ngai leh insawn duhte tan dilna (claims and objections) lut te chu Municipal inthlanna atana Returning Officer (MERO/ AMERO) ten 02.05.2024 - 08.05.2024 chhung khan an endik a. Hetianga an enfiah zawh hnu hian MERO-ten thutlukna siamfelin, hming thunluh ngai, paih ngai leh siamthat ngaite chu thliar hran leh a ni a, hemi hnu hian Data Entry (Computer-a thunluh hna) thawh zui nghal char char a ni ang.

Tun tum Final AMC/Local Council Electoral Rolls-a Elector awm zat chu Ward XIX tan mi 13,344 a ni a; Draft E/roll ah 13,172 niin 1.31% in a pung a ni. Sakawrtuichhun Local Council ah mi 1665 awmin Draft E/Roll ah 1636 a ni a, 1.77% in a pung a ni.

Addl DC Pi Lalnunmawii chuan Summary Revision of AMC Ward No. XIX leh Sawrtuichhun Local Council Electoral Rolls, 2024 chuan tluang tak leh hlawhtling taka neih theih nan bialtu MERO, AMERO leh LLO te, Local Council, Political Parties, Tlawmngai Pawl hrang hrangte leh Media te hma lakpui tur leh tawiawmna a sawm a ni.

AMC Ward No. XIX leh Sakawrtuichhun Local Council By-Election neih hun tur chu State Election Commission, Mizoram in a hranpa in hriattirna a la rawn tichhuak leh dawn a. AMC/Local Council Electoral Roll hi MLA Roll nen a hranpa a buatsaih a ni a, hemi a inthun thar, insawn (transfer) leh siamthat (correct) te hi MLA Roll atan a rin nghal theih loh a ni.

Vawiin Final Electoral Roll tlangzarhna ah hian Election Officer Pu Lalnunfela Chawngthu, MERO Pu Lalhmansanga, leh official dangte an tel a ni.