4370/2023-2024
2024 Vau thla ni 28: Lai Autonomous District Council (LADC) hnuaia Village Council (VC) Inthlanpui buatsaih tur atana electoral roll siam thar tur behchhana hman tur draft electoral roll chu vawiin khan Lawngtlai District Election Officer Pu Cheemala Siva Gopal Reddy chuan Lawngtlai DC Conference Hall-ah a tlangzarh a. Draft electoral roll hi political party ai awhte hnenah hlan nghal a ni.
Lawngtlai DEO Pu Cheemala Siva Gopal Reddy chuan VC inthlan atana electoral roll felfai leh rin tlak a awm theih nan a buaipuitu Electoral Registration Officer (ERO) leh Assistant ERO-te leh village level officer-te ṭha taka lo ṭawiawm a, lo thawhpui turin political party ai awh kal khawmte chu a chah a. Inthlan thianghlim, felfai leh muanawm tak buatsaih a nih theih nan an thawhpuina a ngen nghal bawk.
He hun hi Election Officer Pu Denny Lalchhuanawma chuan kaihruaiin, VC Inthlanpui buatsaih tur atana draft electoral roll dinhmun leh a siam ṭhatna kalpui dan tur tlangpui a sawi fiah a. LADC hnuaia VC Inthlanpui chu Mizoram State Election Commission (SEC)-in a buaipui tur a nih thu sawiin, draft electoral roll atan chuan Election Commission of India (ECI)-in kum 2023 kum tira final electoral roll a tihchhuah chu behchhan a nih thu a sawi a. Kum khat chuang a liam leh tawh avangin siam ṭhat ngai a tam a rinawm thu sawiin, MLA inthlana vote thlak ngeite pawh draft roll-ah hian an chuan loh theih avangin mipuiin an dinhmun inen nachang an hriat a pawimawh hle dawn a ni, a ti.
He hunah hian election official-te, Lawngtlai khawpui chhunga VLO-te leh political party ai awhte an kal khawm a. Electoral roll dik leh felfai zawk a awm theihna tura hma lak dan tur rawtna hrang hrang sawi ho a ni bawk.
LADC hnuaiah hian VC sawmkua pakua (99) awmin, draft electoral roll-a a lan danin, vote nei mipa 26,683 leh hmeichhia 27,420, an zavaiin mi 54,103 an awm a. Vote tam berna 72-Chandmary (Lawngtlai) VC Constituency-ah voter mipa 1,286 leh hmeichhia 1,405, an zavaiin voter 2,691 an awm a. Vote tlem berna 59-Chamdurtlang-II VC Constituency-ah voter mipa 45 leh hmeichhia 43, an zavaiin voter 88 an awm thung.
Vawiina tlangzarh tak draft electoral roll aṭanga paih ngai emaw, belh ngai emaw, siam ṭhat tur emaw neite tan March ni 28, 2024 aṭanga April ni 5, 2024 chhungin claim & objection hun hawn a ni a. India khua leh tui, tribal, April ni 1, 2024-a kum 18 tling chinte chu VC electoral roll-ah hian thun theih a ni a. Final electoral roll hi April ni 17, 2024-ah tlangzarh tura ruahman a ni.
Attachment
- Loading attachment...
