North East Zone Cultural Centre (NEZCC) leh Mizoram Art & Culture Department ?ang kawp huaihawtin hnam lam hmanga India hmarchhak hnamte ziarang inhriat tawnsak leh chawi larna tur kawnga hma lakna pakhat Discover North East - Mizoram 2019 chu Lawngtlai District-a a ni thumna atan vawiin khan Central YLA khelmualah buatsaih a ni.

He hun hi Lawngtlai District Bawrhsap Pu N. Chakhai MCS chuan khuallian niin a hmanpui a. India hmarchhakah pawh district kilkhawr ber Lawngtlai District-a hnam lam chawi larna tur hun buatsaih a ni chu lawmawm a tih thu sawiin, mahni hnam lam leh incheina leh mahni hnam ziarang te ngaihhlut a, humhalh leh chawi lar chu hnam ropui zia leh hnam din chhuahna atana thil pawimawh tak a ni, a ti a. Kan khawtuala hnam dangin an hnam lam leh incheina te chhuang taka an rawn pho lang chu entawnin, ram dangah pawh hniam bika inngai lova ngampa taka kan nihna pho chhuah ve ngam kan zir tur a ni, a ti.

He hun hi LADC General Administration Department-a Deputy Secretary Pu LZ Tluanga chuan a kaihruai a. Mizoram Art & Culture Department-a Programme Coordinator Pu F. Lalthanmawia chuan hun buatsaih a nih chhan leh an kalpui dan te a sawi a. India ram chu cultural zone 7-a ?hen a nih thu leh hmarchhaka state pariatte chu North East Zone hnuaia an awm thu te, hnam ziarang inhmuhpui tawn a, mi hriat lohva awm mai mai tur pho chhuah nan te, chumi hmanga hnam hrang hrangte inunauna, inpumkhatna leh inhriat belna atan chu programme chu buatsaih a nih thu te a sawi.

Discover North East - Mizoram 2019 Lawngtlai District atan hian Odisha, Jharkhand, Tripura leh Assam a?angin cultural troupe pakhat ?heuh an lo kal a. Odisha troupe-ah hian member 14 awmin, Ghumura Dance an entir a; Jharkhand a?angin mi 15 lo kalin, Natwa Dance an entir a; member 14 telna Tripura troupe-in Hozaigiri lam entirin, Assam a?anga member 15 lo kalte'n Bihu Dance an entir a; tualchhung lam a?angin YLA Chandmary Branch-in Chawnglaizawn, YLA Council Veng Branch-in Sarlamkai leh YLA College Veng Branch-in Cheraw te an entir bawk.

Vawiina hun hman bakah hian nimin leh nimin piah lam khan Paithar leh Lawngtlai AOC Vengah te heti ang hun hi buatsaih a lo ni tawh bawk.