6th February 2019 (nilaini) atanga ni thum chhung a bial fang kuala zin mek South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister ni bawk Dr R. Lalthangliana chuan Hnathial, Tarpho, Khawhri, Thingsai, Bualpui H, Cherhlun, New Ngharchhip leh Ngharchhip te a tlawh hnuah vawiin khan Tuipui D, Darzo, S Vanlaiphai, New Kawnpui, Lungpui Tlang leh Muallianpui a tlawh. Heng khua ah te hian khawtlang hmasawnna tura hnathawh tul hrang hrang a hmunah enfiahin sawrkar official-te leh khawtlang hruaitute hmalak dan tur a sawipui.

A khaw tlawh ah te Minister hi mipui thahnem takin ropui taka lo hmuakin mipui leh khawtlang hruaitute nen inkawmhona hun tha tak hman a ni a. A bial chhung ti hmasawn tura inkalpawhna kawng (Physical Connectivity) tha tak siam chu hna hmasaa neih a tum thu sawiin hmun hrang hrang ah hmalak tan nghal a ni, a ti a. Sawrkarin mipuite hriselna a ngaih pawimawh thu sawiin Sub Centre, Primary Health Center leh District Hospital ah te thawktute mamawh hmanrua (equipments), building leh ruhrel te tih changtlun zel a ni dawn a ni, a ti a.  Damlo leh mi harsate hmakhua ngaiin Council of Ministers meeting January 10, 2019 a neihah thisen sawngbawlna senso (Blood Processing Fee) unit khata Rs 550/- lak thin chu sawrkar hospital bik atan tih tawp niin notification pawh tih chhuah nghal a ni, a ti a. Hun lo kal zel turah sum dinhmun a zirin zau zawka Private Hospital te pawh huam thei tura hmalak chhunzawm a nih tur thu kalkhawmte a hrilh a ni. Sawrkar doctor engemawzat lak belh turin MPSC ah hmalakna a kal mek thu a sawi bawk.

Socio-Economic Development Policy (SEDP) chungchang sawilangin Commerce & Industries Minister chuan he hmalakna in a tum ber chu mirethei te dinhmun chawikan, eizawnna neilo te hnena eizawnna ngaihtuah pui, intluk tlan lohna (inequality) tih tlem te a ni, a ti a. SEDP chu a thlawna pawisa sem ngawt ni lovin inkaihhruaina mumal tak nen 'project based' a kalpuiin hna (trade) hrang hrangah training mumal tak nen tanpui an nih tur thu a sawi. Ei leh bara intodelh tur chuan thlai tharchhuah mai piah lamah awmze nei taka sawngbawl a pawimawh a ni tiin food processing lamah uar taka hmalak a nih tur thu a sawi. S Vanlaiphai, Hnahthial leh Darzo khua te huam turin Sawrkar Laipui Ministry of MSME 'Scheme of Fund for Regeneration of Traditional Industries' (SFURTI) scheme kaltlanga sawhthing sawngbawlna hmunpui - 'Ginger Processing Cluster' din a nih tur thu sawiin he hmalakna atana feasibility study pawh zawhfel a nih tawh thu a tarlang bawk. Handloom and handicraft lamah pawh nasa taka hmalak a tum thu sawiin sawrkar laipui Ministry of Textiles nen tangkawpa puan tah leh puan thui lama training uar taka kalpui a nih tur thu a sawi.

Hmasawnna mamawh hrang hrang mipuiten a hnena an lo thlen te tih hlawhtlin ngei a tum thu sawiin mipuite pawh an mawhphurna hre renga sawrkar hmalaknate thahnemngai taka tawiawm a ti hlawhtling turin a chah a. A hmalakna ah te thurawn pe fo thin tur leh an mamawhte in thlah rung hauh lova thlen thin tura chahin mipui leh sawrkar official-te tawiawmna nen a mawhphurna te tha taka hlenchhuah ngei a tum thu a sawi.

Minister hi Pu J. Hmingthanmawia, Director Commerce & Industries, Dr F. Lallianhlira, Principal Director H&FW, Pu R. Lalrintluanga, CE (Road) PWD, Dr H. Lalchungnunga, Director, DHS, Dr T.Lalhmangaihi, Director, DHME leh Pu HD Lalrintluanga, Joint Director Commerce & Industries te bakah Lunglei District official te, khawtlang hruaitute leh party hruaituten an tawiawm a.  Minister leh amah zui tute hi zaninah S Vanlaiphai ah riakin naktukah Aizawl lam panin an haw leh ang.