Kum khata tum hnih hman thin rulhut hlo pawimawhzia inzirtirna ni "National Deworming Day" chu kumin 2019-a a tum khatna atan vawiin khan Lawngtlaia Model English School-ah a hawnna hun hman a ni.

Kumin 2019-a National Deworming Day thawh khatna hman hun tura sawrkar laipuiin a ruahman chu February ni 10 hi a ni a. Pathianni a nih avangin hun remchang zawk vawiinah a hawnna hun hi hman a ni.

He huna khuallian, Lawngtlai SDO (Sadar) Pi Rochuangkimi Khenglawt MCS chuan rulhut pai naupangte chu an hrisel thei lo va, an zirlai leh nunphungah harsatna tam tak an tawh phah thin tiin, sawrkarin rulhut chimawmzia leh rulhut hlo ei pawimawhzia inzirtirna a buatsaih thin chu lawmawm a tih thu a sawi a. Faina leh thianghlimna ngai pawimawh chungin, rulhut laka kan himna tura Health Department hma lakna hi tihhlawhtlin ngei i tum ang u, tiin kal khawmte chu a sawm nghal a ni.

National Deworming Day hawnna inkhawm hi Lawngtlai District Chief Medical Officer (CMO) Dr Lalthlamuana chuan kaihruaiin, National Health Mission (NHM) hnuaia District Programme Manager Pi Lalkhawngaihdawngi Chinzah chuan report a pe a. National deworming day hawnna chu Lawngtlai District hmun 5-ah hman a nih thu te, kum 1-19 inkar naupangte hnenah rulhut damdawi pek tur a nih thu te leh naupang zawng zawng tuam kim thei turin sikul mai bakah, khua/veng hrang hranga health sub-centre leh anganwadi centre-ah te sem a nih tur thu te a sawi.

He hunah hian Lawngtlaia health worker training-na ANM zirlaite chuan kut sil dan dik leh him a takin an entir a. Khuallian Pi Rochuangkimi Khenglawt chuan naupang thlan bik panga chu rulhut damdawi a eitir a. QAC Programme Assistant Pi Lalduhawmi chuan lawm thu sawiin hun a khar a ni.