Vawiin khan Social Welfare Minister Pisaah Mizoram Social Defence & Rehabilitation Governing Board memberte leh Social Welfare Minister Dr K Beichhua te an thukhawm a, MSD & RB hnuaia 2018-19 chhunga an hmalaknate, PISGHA, Thingsulthliah De-addiction cum Rehabilitation centre thawm that chungchangte leh thawktute hlawh siam that chungchang sawi ho a ni.

Minister Dr K Beichhua chuan,”Ruihhlo do leh tih rem hi Mizoram sawrkar in ngaipawimawh hmasakah a dah a, ruihhlo laka Mizoram kan fihlim theih nan hma ala zel dawn a ni,” a ti a,”Ruihhlo vanga buaina, harsatna leh thihna hial thleng thin hi mi chhungkaw ta tur bik chauhah ruat lovin kan inchhungkhur ngeia pawh a thleng thei reng a ni tih hria ila, ruihhlo tih remna kawngah hian mitin hian mawhphurna kan nei tlang vek a ni tih kan hriat thar a pawimawh hle” a ti bawk. Dr K Beichhua chuan ruihhlo ngaite enkawl leh mi tangkai zawka chherna kawngah mithiam mamawhna a sang hle thu sawiin MSD & RB hmalaknate chu fakawm a ti a,” Home leh De-addiction centre atangte hian Natna inkai chhawn theite ven leh enkawl uluk zawk a kalpui a tul bik a, Mizoram Drug Treatment cum Rehabilitation Centre Accreditation Rules pawh heng ruihhlo ngaite enkawlna in hrang hrangte mumal leh rualkhai zawka kalpui a nih theih nan peih fel a ni tep tawh a ni,” a ti bawk.

Pi Lalhlupuii Sailo, CEO, MSD&RB in power point presentation hmangin MSD&RB lo in din chhoh dan leh an hmalakna kalpui mekte tar lanna hun a hmanga, ruihhlo bawi a tang mi engemaw zat an awm rualin ruihhlo laka fihlim thahnem tak an awm thu a sawi a, la ti velo te tan venhimna leh zirtirna tha pek a tul zia a sawi bawk. De-addiction cum Rehabilitation centre a thawk mi 29 te chu TTK Hospital, Chennai ah training neiin MSD & RB, Social Welfare Department hmalakna in tirh an nih mek thu sawiin PISGAH, Thingsulthliahah mi 15 enkawl mek an nih thu a tar lang bawk.

Vawiin thutkhawmna hi Minister Dr K Beichhua, Chairman MSD & RB in a kaihruaia, Pi K Vanlalrawni, Vice Chairman leh Secretary, SWD, Pi Laldikkimi, Member Secretary leh Director, SWD, Pu Sawihlira, Finance Secretary, Pu Ngurchungnunga Sailo, Commissioner Exise & Narcotics, C Lalnunmawia, Deputy Commandant General cum Joint Director, Mizoram Home Guards & Civil Defence Department, Pu Zosangliana, AIG-I, Dr C Zirliana, Joint Director, H&FW leh Pu Lalrikhuma Sailo, Adviser cum Jt Secretary te an tel a ni.