November ni 28-a Assembly inthlanpui neih tur atana Lawngtlai District chhunga inbuatsaihna kalpui mekah Nimin khan he inthlan atana mawh phurtu hrang hrangte Lawngtlai DC Conference Hall-ah koh khawm niin, Model Code of Conduct (MCC) leh Election Expenditure Monitoring (EEM) chungchang training pek an ni.

He hun hi Election Officer Pu Lalrinawma MCS chuan a kaihruai a. Inthlanna felfai tak neih a nih theih nana mawhphurhna nei zawng zawngte'n tha taka an hlen chhuah a pawimawh thu sawiin, harsatna an neih paw'n District Election Office-ah thlen zung zung turin a chah bawk.

Lawngtlai SP Pu Amit Goel IPS pawhin inthlan kaihhnawihah thil duhawm lo thleng thei hrang hrangte veng turin inbuatsaihna kalpui a nih thu a sawi a. Venhimna lam hna thawktute chuan fimkhur taka an mawhphurhna hlen turin a chah.

Training-ah hian MLA Election 2018 atana Lawngtlai District chhunga mawh phurtu hrang hrang - sector officer, police sector officer, flying squad, static surveillance team, video surveillance team, expenditure monitoring cell leh security personnel te koh khawm an ni a. He hunah hian inthlannaa mawhphurhna neite'n model code of conduct leh election expenditure monitoring chungchanga an hriat tur pawimawh hrang hrangte Master Trainer Pu Lalsanglura MCS, Sub-Deputy Commissioner chuan powerpoint presentation hmangin a hrilhfiah a. Kal khawmte'n hriat thiam loh an neihte sawi hona hun hman zui a ni bawk.

Lawngtlai District chhunga Assembly bial pathum Tuichawng, Lawngtlai West leh Lawngtlai East-ah te Election Commission of India atanga tih tur ruahmante hlen chhoh zel a ni a. Tun dinhmunah chuan Election hmachhawn tura inbuatsaihna kalpui mekah harsatna sawi tur a la awm lo.