1143/2021-2024

2023 Vawkhniahzawn thla ni 14: Vawiin khan Lawngtlai District Level Media Certification & Monitoring Committee (MCMC) chu Deputy District Election Officer Pu Abraham Beirazi Khithie hovin a office chamber-ah an ṭhu khawm a. Mizoram Legislative Assembly Inthlanpui, 2023 atana advertisement rate hman tur chungchang leh thil pawimawh hrang hrang an sawi ho.

Chairman Pu Abraham Beirazi Khithie chuan Election Commission of India (ECI)-in inthlanpuiah candidate-te'n sum an hman theih zat bituk a siam ṭhin tih sawiin, an senso chhut nan thil hrang hrang lei leh hman man bituk a ṭul a, print & electronic media-a advertisement rate pawh felfai tak siam a ṭul tih a sawi a. Print media-ah chuan sawrkar rate ding lai a awm a, electronic media-ah sawrkarin rate hranpa a siam loh avangin Cable Operator-te nen inrawn tlanga man bituk siam a ṭul a ni, a ti.

He ṭhut khawmah hian Election Officer, DIPRO, District MJA President leh General Secretary leh Lawngtlaia Cable TV pahnih - KT Vision leh SkyNet lam ai awhte an tel a. Cable TV-a advertisement chi hrang hrang - video, scroll leh sponsorship atana man bi hman tur an tuk bakah, media kal tlanga inthlan kaihhnawih puanzar chungchang felfai leh thianghlim taka kalpui a nih theih dan tur an sawi ho bawk.