1142/2023-2024

Aizawl, 14.07.2023: Y-20 Meet on Nationalism, Patriotism & Development khuhhawnna chu vawiin khan Sports & Youth Services Department leh Mizo Zirlai Pawl (MZP) tangkawp chuan Vanapa Hall ah college zirlaite sawma buatsaih a ni a. He hunah hian Chief Minister Pu Zoramthanga chu khuallian niin Sports & Youth Services Minister Pu Robert Romawia Royte chu khualzahawm a ni.

Ministry of Youth Affairs & Sports, Govt. of India chuan India ramin G-20 Presidency a chelh chhunga India ram hmun hrang hranga Youth-20 Programmes a hman chhoh mek chu Mizoramah hman a ni ve dawn a. G-20 Secretariat lamin phalna an pek tawh angin heng programme te hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak in zirtirna hun atan Sports Department leh MZP tangkawpte hian buatsaihin hma an la a ni.

Chief Minister chuan thu sawiin, thupui pawimawh tak hmanga thalaite tan Y-20 meet buatsaih a ni chu lawmawm a ti a. Resource person te thusawi chu tangkai taka an chhawr a beisei thu a sawi. Vawiin intawhkhawm thupui zinga pakhat nationalism - hnam thinlung chu pawimawh a tih thu sawiin, hnam thinlung chu hmanlai atang tawhin hnam dangin mahni hnam an chimral loh nan a lo piang a hnam humhimna atanga lo chhuak a nih thu a sawi. Hmasawnna atana hnam rilru put a pawimawh thu a sawi bawk a. Chief Minister chuan nationalism leh patriotism hmanga development a thlen theih dan sawiin, indopui avanga ram pahnih tlachhe vek Germany leh Japan chu tehkhin thu ah a hmang a. War reparation te pe in, economy leh politics lama chhe vek mahse hnam rilru nghet tak pu in an intungdung leh a, tunah chuan khawvel ram hausa leh changkang ber te zing ami an ni leh tak dan a sawi a. Mizoram pawhin harsatna hrang hrang tawkin sum indaihlohna te lo thleng mahse hmasawnna nasa zawk a la thleng thei tih hria in, hnam hmangaihna thinlung nena ke pen theuh turin thalaite a sawm a ni.

Khualzahawm Pu Robert Romawia Royte chuan India ramin G-20 Presidency a a chelh chhunga tangkai thei ang bera hman a tum dan leh chumi kal zelah chuan thalaite ngaihpawimawh an nih thu a sawi a. Y-20 meet duanchhuah a nih dan sawiin, Mizo thalaite mamawh leh an tana tangkai tura ngaih anga buatsaih a nih dan leh, fund source hranpa a awmloh avanga senso tur pawh phal taka state sawrkarin a tum avang te'n lawmthu a sawi bawk a. Y-20 chuan Mizoram pum huamin thalai 21,000 huam tuma buatsaih a nih thua sawi. Minister chuan vawiin Y-20 meet a presentation ngaihthlak atang chuan hriselna ngaihpawimawh nachang leh ruihhlo laka fihlim tura fimkhur a tul zia te, cybercrime pung chho zelah social media hman fimkhur nachang hriat leh ram inrelbawlna ngaihvena tulzia te an chharchhuah a beisei thu a sawi a ni. SYS Minister chuan ram inrelbawlna ngaihven a hriat chian leh hnam a chian pawimawh thu a sawi a. Indian constitution a Article 371G chu hnam rilru Mizo ten kan put avanga lo piang a nih dan sawiin, Mizo hnam humhimna pawimawh tak, vawiin thlenga a pawimawhna la chiang zel a nih thu a sawi.

S&YS Secretary Dr. Lalrozama chuan he hun hi kaihruaiin vawiinah Aizawla Y-20 Meet khuhhawnna chu district tinah la chhunzawm a nih tur thu a sawi a. Thalaite ah hmasawnna a thlen ngei a beisei thu a sawi. MZP President Pu Lalnunmawia Pautu hnen atangin thusawi ngaihthlak niin, thalaite'n kan nihna ah kan chian a, hnam ah chian a hmangaih nachang kan hriat a pawimawh a ni a ti. Pi Betty Lalthantluangi, Joint Director, MSACS chuan "Intravenous drug use & Harm Reduction Services" tih thupui hmangin presentation a pe a. "Awareness on Social Media & Cyber Crime" chungchangah Pu Lalengzuala, Informatics Officer, ICT Department chuan inhrilhhriatna nei bawkin, Prof. J. Doungel hnen atangin theme subject "Role of Youth in Democracy and Governance" chungchangah thusawi ngaihthlak a ni bawk. Zai leh hnam lam te ngaihthlak a thlirho a ni bawk a. SYS Director Pu Lalnunhlua chuan lawmthu sawiin programme hi a khar a ni.