1141/2023-2024
Champhai, the 14th July, 2023: Vawiin chawhnu dar 3 khan Champhai District chhunga Election official, sector officer leh sector police officer-te pualin Vulnerability Mapping leh Critical Polling Station chungchang leh ven dan tur zirhona DC Conference Hall-ah buatsaih a ni.
He hun kaihruaitu District Election Officer Pu James Lalrinchhana chuan inthlanna muanawm leh felfai nei turin mawhphurhna hrang hrang neite'n tha taka an chanvo theuh an hlenchhuah a pawimawh thu sawiin, inthlahdah a thiang lova, hun bituk ang zela tihtur awmte zawhfel a tul a ni, a ti a. Kalkhawmte chu election chungchanga inkaihhruaina ECI in a duante ngun taka zirchiang theuh turin a chah a. Hriatfiah duh neite hotute zaawh hreh lo tur leh, infinchhuah a tul chang pawha inthlahrung lo turin a fuih bawk.
He hunah hian SP Champhai Pu Lalrinpuia Varte hnen atangin Champhai District huam chhung Assembly Constituency 3, Champhai North AC, Champhai South AC leh East Tuipui AC huamchhung Zone 10 atana Sector Officer ruatte thawhpui tur Sector Police Officer-te ruat an nih thu leh, Champhai District chhung Police Station 3 hnuaiah Vulnerability Mapping buaipui tur Designated Police Officer-te ruat fel an nih tawh thu a tarlang a. Election Officer Pu Lalrinawma Khiangte hnen atangin Vulnerability Mapping leh Critical Polling Station awmzia leh hemi chungchanga hriattur pawimawhte ngaihthlak a ni bawk.
Inthlanna muanawm leh felfai neih a nih theih nan ECI chuan theihtawp chhuahin hma a la thin a. Vawiin training-ah hian mimal tinte'n an dikna, chanvo leh duhthlanna hmanga vote an thlak theih nana boruak muanawm siam a pawimawh dante ngaihthlak a ni a. Inrikrapna leh vaubehna emaw, nawrbehna hnuaia vote thlak a awm loh nan te, Polling Station ralmuang leh felfai a awm theih nana hmalak tulte tarlan niin, zirchianna neih dan turte sawiho a ni bawk a. Inthlan hunah tutenge dinhmun hlauhawm leh derthawnga ding tih ngaihven hmasak a tul thu leh hemi hre tura beng chhit tlan a pawimawh thu te, hetiang dinhmun siamtute zawn chhuah leh chinfel a nih theih nana hmalak tulte pawh ngaihtuahho a ni a; inrawnkhawmna leh zirhona hun hlawkthlak tak hmanho a ni.
