Lai Autonomous District Council (LADC) hnuaia 5-Lungtian MDC Constituency leh Chakma Autonomous District Council (CADC) hnuaia 9-Ugudasury South MDC Constituency-a June ni 6, 2019-a by-election neih tura inthlanna buaipuitu tur Polling Officer leh Asst Polling Officer-te pualin vawiin khan Lawngtlai DC Conference Hall-ah training thawh hnihna leh a hnuhnung ber tur buatsaih a ni.

He'ng MDC bial pahniha by-election atana Nodal Officer i/c Training Pu Lalneihthanga Colney MCS chuan polling official-te hi training a pe a. Tluang leh felfai taka inthlan buatsaih a nih theih nana polling official-te tih tur leh mawhphurhna te sawiin, hriat chian loh zawhna leh chhanna hun hawn a ni a. Nodal Officer i/c EVM Pu Lalsanglura MCS chuan EVM hman dan leh enkawl dan bakah, EVM-a dik lo awm palh thei leh a tih?hat dan te uluk takin a zirtir bawk.

He hunah hian he'ng MDC bial hnih by-election atana Returning Officer Dr Andrew H. Vanlaldika MCS hovin pollinng official-te duty-na tur polling station chu lehkha pawtin siam fel nghal a ni a. Lungtian MDC biala polling station pali (4) - Lungtian-I, Lungtian-II, Vartek leh Vartekkai tea duty tur polling party pali (4) bakah, reserve party pakhat (1) an awm a; Ugudasury South MDC biala polling station pahnih (2) - Ugudasury South leh Jarulsury tea duty tur polling party pahnih (2) bakah, reserve party pakhat (1) dah an ni bawk.

June ni 6-a by-election buaipui tur hian polling official-te chuan naktuk khian an duty-na tur hmun an pan tawh dawn a. Inthlan buaipui tura an mamawh hrang hrang pawh buatsaih fel vek tawh a ni.