Vawiin chawhma khan Reserve Bank of India, Aizawl buatsaihin Aijal Club ah “Responsible Borrowing and Agricultural Finance” tih thupui a hmangin Financial Literacy Week 2019 hawnna hun neih a ni a. He hunah hian Pu Lalhmingthanga, IAS, Secretary Agriculture Department chu Khuallian niin Dr Elizabeth Saipari, Director Horticulture Department chu khual zahawm a ni bawk.

Khuallian Pu Lalhmingthanga, IAS, Secretary Agriculture Department chuan Mizoramah loneitute tan hma nasa tak a lak mek a nih thu tar langin,” Mission Organic Value Chain Development for North East Region hnuaia Farmer Producers Organisation kaltlangin hmarchate, Aieng leh sawhthing tharchhuah kawngah hma lak mek a ni a, tunhnai khan Darzoah Tea processing plant bun a ni tawh bawk a ni,” a ti a,” IFAD hnuaiah Fostering Climate Resilient Upland Farming System (FOCUS) hi kalpui mek a ni a, hun reilote chhungin kan ram loneituten a hlawkna an hmuh thuai kan beisei a ni,” a ti bawk. Pu Lalhmingthanga chuan Mizoram a tunhnaia Fall Armyworm avanga Vaimim chingtuten harsatna an tawh mek thu sawiin,” Heng loneitute channa nasa tak chhawmdawlna tur hian Insurance Company te nena kan inbiaknate chu a hlawhchham leh thin avangin kan ram chhunga bank hrang hrang awm te hi crop insurance policy hmanga loneitute pui tura hmahruaitu ni turin ka sawm che u a ni,” a ti.

Vawiin Financial Literacy Week 2019 hawnna hunah hian Pu C Sangpu Vaiphei, Assistant General Manager, RBI Aizawl in kalkhawm te lawmna thu a sawi a, Pi Mary L Deng, General Manager in Financial Literacy Week chungchang sawi hawnna hun hmangin Pu SN Mallick, General Manager, NABARD leh Pi Elizabeth Saipari ten thu tawi sawina hun an hmang bawk a ni.

Financial Literacy Week hi mipuite hnena sum enkawl dan chiang zawk a inhriathriatna hun atan kum tin RBI in an buatsaih thin a. Kumin Financial Literacy Week 2019 ah hian “Sum puktu rintlak leh Bank nen inthlunzawm loneitute hamthatna” tih thupui hmangin June Ni 3 atanga Ni 7, 2019 inkar hian hman tura  ruahman a ni.

Ram hmasawnna atan loneitute hi an pawimawh hle rualin Loan hmang thiam loneitute chuan hma an sawn leh zual thin a ni. Loneituten bank atanga sum tam zawk an puk theihna atan  RBI chuan nasa takin ruahmanna a siam thin a. Kum engemaw zat kalta atang khan RBI chuan sum puk theih dan tur kawng hrang hrang leh Financial Inclusion tih chakna atan hmalakna tam tak a nei thin a ni. Loneitute hnenah sum enkawl dan chiang zawka hriatfiah an nih theih nan, Bank branch hrang hrang leh an website-ahte, Financial Literacy Center-ahte leh ATM ahte hriattur pawimawh, poster leh leaflet hmangin RBI chuan a buatsaih a. Doordarshan leh All India Radio kaltlangin June thla chhung hian Mass Media Campaign a buatsaih dawn bakah Sihphir leh West Lungdar ah Financial Literacy Week hi hman chhunzawm tur a ni.