No.6404/2020-2021

Lawngtlai, Khuangchawi thla ni 29, 2020: Kumin kum tawpa Lai Autonomous District Council (LADC)-a Member of District Council (MDC) Inthlanpui buatsaih tur atana hman tur final electoral roll chu vawiin khan Lawngtlai District Election Officer, Lawngtlai Bawrhsap ni bawk Dr Andrew H. Vanlaldika chuan DC Conference Hall-ah a tlangzarh a. Draft roll hi political party ai awhte hnenah a hlan nghal.

Bawrhsap chuan electoral roll tlangzarh chu democracy rama inthlan kalkawngah thil pawimawh tak pakhat a nih avangin political party te paw'n ngai pawimawh deuh deuh zel se, a duh thu a sawi a. Tun tum MDC-LADC electoral roll buaipui tura hun a tam loh avangin a buaipuitu ERO, AERO, VLO leh Election branch-a thawktute an hah hle tih sawiin, LADC area chhungah inkal pawhna leh inbiak pawhnaah harsatna tam tak a awm chunga a hun taka tlangzarh tura roll peih fel a ni chu a lawmawm tak zet a ni, a ti. Roll chu theih tawpa uluka an buaipui thu sawiin, electoral roll-a hmun hniha chuang kawp tam tak an paih bakah, tum danga roll tibuaitu ni thin, mahni chenna hmun ni si lova electoral roll-a insawn (transfer) tum tam tak an dan bawk avangin final roll pawh chu hrisel leh felfai zawk a nih an rin thu a sawi.

Final electoral roll tlangzarh tak atanga a lan danin, LADC MDC atana vote nei mipa 25396 leh hmeichhia 26146, an vaiin mi 51542 an awm a. Draft roll aia a tlemna hi voter 260 niin, hei hi MDC inthlana vote nei thei lo non-tribal leh mitthi leh roll pakhat aia tama awm kawp eng emaw zat paih a nih vang a ni. MDC bial 25 awmah, voter 1246 awmna 4-Cheural MDC Constituency chu voter tlemna ber niin, voter 3477 awmna 20-Sakeilui MDC Constituency chu voter tamna ber a ni thung a. Polling station 111 awm zingah, 25/4-Chamdurtlang-II Polling Station-ah voter 75 awmin, an tlem ber a, 3/2-Sangau Vengthar Polling Station-ah voter 1016 awmin, an tam ber thung.

Final electoral roll atana draft electoral roll siam that laite enfiah duh tan ERO office, AERO office leh mahni bialtu theuh VLO te hnenah office hun chhungin enfiah theih reng a ni.

Attachment

  • Loading attachment...