No.6405/2020-2021

Aizawl, the 29th October 2020 : Vawiin khan Health & Family Welfare Minister Dr. R. Lalthangliana hovin SAD Conference Hall, MINECO ah COVID-19 dinhmun thlirho a ni a. COVID Care Centre (CCC) chungchangte, COVID-19 damlote, inenkawlna hmun atanga chhuah dan kalphung discharge protocol hman lai mek leh High Risk Primary Contact chungchangte sawiho a ni.

Dr. R. Lalthangliana chuan COVID-19 positive case a pun zel avangin ruahmanna kalpui mek leh kalphung neihsa te chu ennawn a, thlirlet a tul thu sawiin a tha ber kan duh avangin ngaihtuahna thar kan sen reng a ngai a, kan boruak tawn zel angin ruahmanna te her rem leh siamthat a tul fo thin a ni, a ti. Tuhnaia COVID-19 kai tharah naupangte an tam avangin a bika naupangte enkawlna tur Child Freindly CCC ruahman chu ngaihpawimawh anih thu sawiin hetiang hi BSUP Durtlang tuna CCC atana hman mek chu ruahman anih tawh thu a sawi a. Social Welfare Department nen inberawnin ITI Bal Bhawan tunah Quarantine Centre a hman mek pawh, a awm mek te an chhuah hunah Child Friendly CCC a ruahman turin hma lak mek anih thu te pawh a sawi a ni.

Meeting ah hian Medical Operational Team ten Discharge Protocol leh High Risk Positive Contact inkaihhruaina leh kalphung hman meka inkhunghran hun pawhsei chungchanga rawtna an thehluh chu zau takin sawiho a ni a. Heng te hi ennawn a siam rem hret tha tiin a rang lamin hei hi tihfel nise an ti a. Aizawl khawpui chhunga CCC dinhmun te thlirho niin tun dinhmunah inenkawlna hmunhmaah thlaphanna tur la awm lo mahse CCC neih belh zel chu tha an tih thu sawilan a ni.

Meeting ah hian Medical Operational Team hotupa Dr. ZR Thiamsanga, MLA, Chief Secretary Pu Lalnunmawia Chuaungo, DM &R Secretary Pi Lalbiaksangi, Health Secretary Pu H. Lalengmawia, Health & Family Welfare Department hotulu leh official dangte, bakah IMA Mizoram Chapter leh Non-Government Hospital Association aiawhte an tel a ni.