No.6406/2020-2021

Aizawl, the 29th October 2020 : Vawiin chawhnu khan I&PR Minister Pu Lalruatkima pisaah Mizo Student Union (MSU) hruaitute lengin Minister hova inkawmna neih a ni a. Kar kalta lawka MSU ten Zampui tlangdung leh khawthlang lama ramri chungchang leh thil hrang hrang enfiah a an kalna leh an hmalakna te report pek paha sawrkara an duh dante an thlen nghal bawk a ni.

He inkawmhonaah hian Mizoram leh Tripura inkalpawhna kawng siam that ngaite leh motor lian kal theih tura kawng awmsa cheibawl te sawi a ni a. Bairabi rel station tihchangtlunna atana an rawtnate pawh sawiho a ni bawk a. Mizoram sawrkarin hma a laknate pawh sawiho niin inhrilhhriatna hun neih a ni a. Tuna kan dinhmun mek Cachar lam nena kan inrinna a buai avanga Tripura lama chaklak theih dan pawh sawiho a ni a, hemi bakah hian Myanmar lam leh Manipur lam atanga chaklak dan leh hmalakna tur awm ang ang te pawh sawiho a ni bawk.

He hunah hian Minister chuan MSU hruaitute hnenah tan ho a tul zia sawiin MSU te leh pawl hrang hrangte hmalakna ah lawmthu a sawi a, Sawrkar ringawt atanga thil tih har tam tak awmte-ah pawh NGO ten thahnemngai taka mahni ram tan tia sawrkar thlawp tlat chunga hmalakpui zel turin a sawm bawk a ni. Inkawmhonaah hian kan ram humhim tur chuan a mi chengte hi ei leh bara kan intodelhte a ngai a, inhlawhfa chawpte thleng pawha sum kan dehchhuah a tul thu a sawi a ni.

Rural Development bikah MNREGS (ni za inhlawhna) atan central Sawrkar atang pawhin 22/10/2020 khan Rs. 107 crore hmuhbelh a nih thu a sawi a, tun sawrkar kum kal mek ah hian April atanga October thla thleng Job Card holder te ni 74 (days) inhlawhtir an ni tawh a, tunah hian November ah ni 7 leh December ah ni 7 inhlawh tir tura ruahman a nih thu a sawi bawk a ni, hei hian thingtlang lama harsa zawkte a puih ngei a beisei a ni. MSU tena an thil ngaih pawimawhte hi hotute hnena a lo sawipui tur leh a tul anga hma a lo lak tur thu Minister hian a hrilh bawk a ni