No.6407/2020-2021

Lawngtlai, Khuangchawi thla ni 29, 2020: Nehru Yuva Kendra (NYK), Lawngtlai District hnuaia District Advisory Committee on Youth Programme (DACYP) chu vawiin khan an Chairman, Lawngtlai Bawrhsap Dr Andrew H. Vanlaldika hovin a office chamber-ah an thu khawm.

Chairman Dr Andrew H. Vanlaldika chuan Lawngtlai District-a thalaite'n hma an sawn nan leh an dinhmun chawi kan nana NYK hma lakna chu fakawm a tih thu sawiin, ram hmasawn ni turin thalaite rilru chher dik leh thiam thil bik hmanga eizawnna kawhhmuh chu ngaih pawimawh tur a ni, a ti a. District NYK hmachhawp hrang hrang chu lian tham tak ni hlawm lo mah se, hmasawnna tak tak khawih thil a nih avangin harsatna an tawk a nih chuan tanpui tur leh thawhpui turin District Administration a inhawng reng a ni, a ti.

NYK Lawngtlaia District Youth Coordinator (DYC) Pi Mercy Sellate chuan NYK hma lak tawhna hrang hrang report pein, kum 2020-21 chhunga an programme kalpui dan tur ruahmanna 'Annual Action Plan, 2020-21' a pharh nghal a. Annual Action Plan hi uluk taka thlir ho a nih hnuah pawm a ni.

Action Plan pangngai pawn lama hmachhawp (special programme) hrang hrang pawh sawi ho nghal a ni a. Kut them thiam thil chawi kan nan leh hnam rohlu humhalh nana NYK hnuaia din Phawngpui Handicraft Centre kalpui zel dan tur te, District chhunga taksa mamawh khawp ei tur tha hmuh loh vanga harsatna sut kian nana thing hrisel moringa (thing behlawi) chin pun leh vawrh lar te, vantlang thei huan (community fruit/vegetable garden) buatsaih leh thlai chi dah khawlna (seed bank) ruahman te a hlawhtlin theih dan tur sawi ho a ni.

NYK lam atang hian COVID-19 hri leng karah hma lak har deuh mah se, hri laka fimkhurna hrang hrang zawm chunga faina kawngah leh ni pawimawh hman chungchangah hma lak chhoh reng a nih thu ngaihthlak a ni a. Hma lakna hrang hrang zingah Agriculture leh Horticulture Department te nen tang hova kumin July thlaa moringa tiak 1000 sem chhuah te, COVID-19 laka himna atana hmai tuamna insiamsiak (mask making competition) buatsaih a nih thu te tar lan a ni.