No.6408/2020-2021 

Vawiin (29.10.2020) tlai dar 6:30 khan Assam leh Mizoram ramri chungchangah Union Home Secretary, Mr Ajay Kumar Bhalla hovin Mizoram Chief Secretary, Pu Lalnunmawia Chuaungo leh Assam Chief Secretary, Mr Kumar Sanjay Krishna ten Video Conference kaltlangin  meeting an nei a. He meeting-ah hian Assam leh Mizoram inkalpawhna kawngpui dan chung chang leh ramri vela buaina sosang mek tihtawp chungchang sawiho a ni.

Assam sorkar leh Home Ministry ten ramri buaina hmuna police dah te withdraw nghal ni se ti a rawtna chu Chief Secretary Pu Lalnunmawia chuan, Assam lam atanga ramri hrula cheng mipui te nasa taka ti thlabar zawnga hma lak a nih avanga mipuite thlamuan tura police tlemte dah mai a nih thu sawiin, tun dinhmunah chuan Mizoram police te hi ramri buaina  atanga  hnuhdawh a rem lo tih a sawi a. Ramri buaina hmuna Assam lam atanga senior officer kal ten henglaia duty official leh police junior zawk te an vau thin hi a dik lo hle a ni tih sawiin, ti tawh lo se tiin rawtna a siam bawk a. Assam lamin Joint Secretary hova meetinga thutlukna te an zawm nghal laiin Mizoramin engmah an ti ve lo ti a an sawi chu  Chief Secretary Pu Lalnunmawia chuan, meeting a remtih angin, October ni 17-a buaina thlen hnu a Lailapur bula Mizoram police section hnih dah te chu Vairengte lamah hnuhkir a nih tawh thuin a chhang a. Assam leh Mizoram inkara thu inchuh hrang hrang te sawiho a nih hnu in Assam Chief Secretary chuan Mizoram mamawh phurtu motor dan te an tlan leh vat theih nan a hma la tura Silchar DC instruction a pek thu a sawi a, naktukah chuan traffic hi mumal taka, a pangngaia che hman tura a beisei thu a sawi a ni.

Video Conferencing ah hian Deputy Commissioner te hriatpuina lovin officer ten ramri buaina hmun hi tlawh tawh loh ni se, Deputy Commissioner  ten regular takin meeting nei thin se ti in an rel a ni.