2059/2023-2024

Lawngtlai dated 29th September 2023: Vawiin chawhma khan District Election Office leh District Information & Public Relations Office ṭangkawp buatsaihin MLA inthlanpui lo awm tur atan Cable TV leh Social Media hman chungchanga inkaihhruaina inzirtirna neih a ni a. Pu Hmingthanzuala, DIPRO chuan Media Certification & Monitoring Committee chungchang zirtirna pein MJA, Lawngtlai district hruaitute leh Skynet leh KT Vision Cable Network aiawhte an tel a ni.

Pu Hmingthanzuala, DIPRO chuan khawvel thiamna ṭhang zel ah Electronic leh Social media-in mi tin nunah hun a luah tam tawh thu sawiin a hmang thiamte chuan hlawhtlin nan leh dinchhuahpuina hmanrua a an hman laiin a hmang thiam lote erawh mualpho leh hrem ngai hial a an awm thu a sawi a. MLA inthlanpui lo awm tur ah pawh hian MCMC chuan heng Electronic Media hmang a Model Code of Conduct bawhchhiatna a awm loh nan uluk takin Cable TV leh Social Media hrang hrang vil a nih tur thu a sawi. Training-na ah hian DIPRO chuan MCMC mawhphurhnate tarlangin Political Party hrang hrangte chuan Cable TV leh Social Media hmanga Campaign an kalpuinaah Sakhua, chi leh chi inhuat theihna te, ram inpumkhatna tichhe thei leh tharum thawh tur a incho chhuahna ang chi tihchhuah chu phal a nih loh thu a sawi a. Dawt leh thubelhchiandawl loh hmang a mimal inbeih thlengin MCMC chuan Electronic Media hrang hrangte hman a phal loh thu a sawi. Inthlan puan a nih atangin Political party emaw Candidate-ten mipui hip nana Electronic Media hmang a fakna an chhuah duh a nih chuan Registered Political Party tan ni 3 leh Unregistered Political Party tan ni 7 hmain MCMC-ah dilna thehluh hmasak a ngaih thu te tarlan niin Advertisement siamna leh Cable TV-a chhuahna senso te chu Political party emaw Candidate Campaign senso a ziahluh tur a nih thute sawi a ni.

Vawiin Media Certification & Monitoring Committee chungchanga Training neih ah hian Lawngtlai district chhung a Chanchinbu leh TV Cable pawt chhungkaw awm dan dinhmunte sawi ho niin inthlanna langtlang leh felfai a awm theih nan Sawrkar, chanchinbumite leh Cable Network neitute thawhho dan tur sawi ho a ni bawk.