2060/2023-2024

Dated Serchhip, the 29th September, 2023: Students’ Self-Support Union (SSU) General Assembly vawi 36-na Serchhip Auditorium a neih mek chu vawiin khan EF&CC Minister TJ. Lalnuntluanga chuan khuallian niin a hmanpui.

EF&CC Minister Pu TJ. Lalnuntluanga chuan Zirlai pawl-a lo tel ve tawh thin a nih thu leh rawlthar an nih atanga an lo inhman ve thin thu sawiin, kum 1995-ah Champhai-ah SSU chu an lo din ve tawh thu a sawi a. SSU thiltum leh hmalakna te chu tha a tih thu sawiin, zirlaite rilru ah mahni intodelh leh kuthnathawh pawimawh zia tuh zel a pawimawh thu a sawi a. Zirlai pawl hruaitu an nih hunlai pawhin kuthnathawh leh hnathawh thawmhnaw ha-a khawlai-a kal a zahthlak loh tih lantirna atan inzirtirna te an lo neih tawh thin thu te, Zirlai inhlawhfa duh tan hnathawh tur an lo ngaihtuah sak thu leh nu leh pa te pawisa dil chu a zahthlak tih inzirtirna te an lo kalpui tawh thu sawiin, hei hian rah tha a chhuah ve nia a hriat thu a sawi a. Mahni thawhchhuah sum chu kan renchem in kan hlut bik tih a sawi bawk.

Minister TJ. Lalnuntluanga chuan SSU chu Zirlai pawl dang angin boruak lian tak nei ni ve lo mah se an hmalakna, mahni intodelh leh kuthnathawh chawisan chu kan Hnam tana lungphum pawimawh tak a nih thu a sawi a. Hemi kawnga inzirtirna an neih te chuan rah tha a chhuah zel a beisei thu leh inzirtirna neih zel a tul thu sawiin, he Assembly-a kal Mizoram hmun hrang hranga zirlaite chu ‘SSU Ambassador’ ni haw theuh turin a chah a. He an hmalakna hi kan nunpui tlan chuan hlemhletna leh eirukna pawh a bo ngei tur thu a sawi bawk a. Hlawhtling tlaka hna kan thawh a pawimawh tih hre reng turin a chah bawk. Minister TJ. Lalnuntluanga chuan intodelh a pawimawh zia sawiin, sawrkar hna sang thawk thei ten an thawh a that rualin, a thei ve kher lo te pawhin kan phak tawk ah zel intodelh tura hnathawh kan inhuam a tul thu a sawi a. Hna sang ringawt chu hna zahawm a ni lo tih sawiin, intodelh tura kan thawh theih ang tha taka kan thawh chu a zahawm thu leh Pathian in kan ramah hian intodelhna tur min pe tih kan hriat reng a pawimawh thu a sawi bawk.

He huna khualzahawm, Serchhip Bialtu MLA Pu Lalduhoma pawhin SSU chu pawl pawimawh tak a ni tih sawiin, Member tam ringawt nih tum lova an dinchhan leh thiltum anga thawktu an nih chuan tlem mah se Ram leh chhungkaw tana malsawmna an nih a beisei thu a sawi.

Vawiin-a SSU General Assembly hi SSU General Hqrs. Vice President Johan Lalremruata chuan kaihruaiin Secretary General PC. Lalawmpuia chuan report a pek bakah an President Darhmingliana chuan thu a sawi bawk a ni. Students’ Self-Support Union hi 27th May, 1985 khan din niin ‘Zirna atan mahni intodelh’ tih leh ‘Kuthnathawh chawisan’ tih te chu an thiltum te a ni.

SSU General Assembly vawi 36-na hi nimin chawhnu khan neih tan niin Serchhip Press Club-ah Rorel Inkhawm an nei a, an thurel zingah Elementary Level-ah Moral Education dah a nih leh theih nan sawrkar ah rawtna thlen nise tiin, Mizoram pumah Intodelh leh Career Drive neih te rel a ni a. Kum 2024 chhungin Mizoram sawrkar hnuaia School-te (a bikin Primary School Level-ah) zirchianna neih a, a tul anga hmalak relin, College Level-ah Debate Competition buatsaih thin an rel bawk a ni. Kum 2023-2025 chhunga SSU General Hqrs. hruaitu thlanna neiin President-ah Darhmingliana; Vice President-ah Johan Lalremruata, Secretary General-ah Benjamin J. Malsawmdawnga; Joint Secretary-ah Gordon C. Vanlalhruaitluanga; Treasurer-ah Lalhruaizela leh Fin. Secretary-ah VL. Malsawmtluanga te thlantlin an ni.

SSU General Assembly hman mek ah hian Vawiin chawhnu lam khan ‘Intodelh Campaign & Career Awareness’ neih a ni a, zanin hian ‘Vangpui Kut’ hmangin General Assembly hi zawhfel a ni ang.