199/2022-2023

Ṭau thla ni 19, 2022 : Vawiin khan Fire & Emergency Services (F&ES), Lawngtlai District leh Information & Public Relations (I&PR), Lawngtlai District te ṭang kawp huaihawtin Lawngtlai Press Club-ah Lawngtlaia thu thar theh darhtute tana kangmei laka himna leh invenna chungchang inzirtirna hun (Special Training on Firr Safety & Fire Prevention for Media Personnel) buatsaih a ni.

He hun hi Lawngtlai District Information & Public Relations Officer Pu C. Lalhruaitluanga chuan kaihruaiin, kal khawmte lawmna thu a sawi a. Kangmei chu chhiatna nasa tak thlen theitu a nih avangin a laka him nana inven dan leh fimkhur inzirtir chu a pawimawh reng thu sawiin, mipui hnena darh zau zawka zirtirna hlan chhawng theitu chanchinbu mite chu tha thlah lova mipui rawng an bawlna kawng khata hman chhunzawm zel turin a chah a ni.

F&ES Lawngtlai Fire Station-a Station Officer Pu K. Lalmuanpuia chuan kangmei chhuah theih dan hrang hrang te, chumi laka inven dan leh fimkhur dan tur te, kangmei chhuah thulha hma lak dan tur leh F&ES hna thawh chungchanga hriat tur pawimawh hrang hrang te a sawi a. Kangmei chi hrang hranga ṭhen a nih dan sawifiahin, kang ṭhelh bur (fire extinguisher) chi hrang hrang leh a hman dan te a taka entirin a sawi fiah nghal bawk.

Mizoram Journalists' Association (MJA), Lawngtlai District President Pu Lalngheta Ralte pawhin thu sawiin, Lawngtlaia chanchinbute'n a theih chin chinah kangmei laka fimkhur inzirtirna an tar lan ṭhat thu leh District MJA-in tun hma aṭanga Lawngtlai Fire Station hmasawnna tura hma an lo lak ṭhin tawh dan te a sawi a. Kangmei laka himna tur leh kangmei venna kawnga Lawngtlai District-in hma a sawn theih nan chanchinbu kal tlang leh District MJA ang pawha F&ES Department thawhpui an inhuam reng thu a sawi.

Vawiina kangmei laka himna tur inzirtirna hun hi India ram puma April ni 14 - 20, 2022 inkar chhunga ‘Fire Service Week’ hman mek puala buatsaih a ni a. He hunah hian District MJA member-te leh Lawngtlaia chanchinbu mite an tel a. Kangmei laka himna leh inven fimkhurna kawnga District dinhmun leh kawng hrang hranga hmasawnna tur te sawi ho a ni bawk.

Fire & Emergency Services Department hnuaiah Lawngtlai Fire Station hi September ni 9, 1998-ah din a ni a. Tunah hian thawktu 10 (Station Officer 1, Leading Fireman 2, Fireman 3, Constable 2 leh Driver 2) an awm mek a. Kang ṭhelh lirthei (fire truck) pahnih, tui litre 2,800 dawng tanky nei an kawl a. Kang ṭhelhna tur tui thunna tur hmun (fire hydrant) hi hmun khat, Lawngtlai Chandmary-ah an nei a, hmun hnih dangah siam belh tura hma lak mek a ni.

Kuminah Lawngtlai Fire Station hi kang ṭhelh turin ṭum 7 an che chhuak tawh a. He'ng hi ram kang vek niin, nunna chan an awm lo va. Kang ṭhelh bakah hian central school, petrol pump leh gas agency ang chi te kangmei chhuak palh thei laka a him dan enfiahin, fire safety no objection certificate an pe chhuak ṭhin a. Sawrkar office hrang hrang leh damdawi in te pawh kangmei laka himna tur inpuahchahna an neih dan an enfiah ṭhin a, a ṭul angin kangmei laka himna inzirtirna an buatsaih ṭhin bawk.

Kangmei chhuah thulhah landline no. 03835-232801 emaw, mobile no. 6909138408 emaw hmang hian eng tik lai pawhin Lawngtlai Fire Station biak pawh theih a ni.