Ni 23-25 August, 2017 chhung khan Lawngtlai CMO Conference Hall-ah Lawngtlai District Health & Family Welfare Department buatsaihin Lawngtlai leh Siaha District-a Medical Officer (MO)-te tan hri danna pek (routine immunisation) chungchang zir hona buatsaih a ni.

He training-ah hian Lawngtlai leh Siaha District-a MO-te an tel tha hle a. WHO atangin Senior Medical Officer (SMO) Dr Lalhlimpuii, UNICEF atangin Consultant Dr Vibharao Patil leh Lawngtlai District Immunisation Officer Dr S. Thaizi te’n training hi an pe a. Thla tin hun bi neia hri danna pek (routine immunisation) kalpui dan tur leh hmasawn ngaihna te an zirtir a ni.

Lawngtlai CMO Conference Hall-ah vek hian vawiin atang khan WHO, Aizawl Unit buatsaihin Lawngtlai District chhunga MO zawng zawng te, District Hospital leh private hospital-a MO te leh health staff thenkhat te tan taksa peng thenkhat zen thutna (acute flaccid paralysis – AFP) leh hri danna pek hnua taksaa harsatna thleng thei (adverse events following immunisation – AEFI) chungchang zir hona buatsaih zui a ni a. He workshop hian naktuk thleng a awh ang.

WHO mi thiamte chuan, zenghri um bo tumna kawngah, taksa peng thenkhat zeng thut (AFP) chu zir chian vat a, enkawl ran a that thu te, hri danna lak hnua taksaa harsatna lo thleng (AEFI) pawh ngaihthah mai lo va, a chhan hriat chhuah tuma zir chian thin a tul thu te an sawi a. Hri danna lak hnua damlohna emaw taksaa awm nawm lohna chu hri danna vang  pawh a ni kher lo thei a; amaherawhchu, mite'n tim lova hri danna an lak theih nan finfiah vat zel tur a ni, an ti bawk.

Attachment

• Loading attachment...