Raja Rammohun Roy Library Foundation (RRRLF) sum cheng nuai ruk (6) hmanga sak, Sihphir Venghlun Branch YMA Library Building chu vawiin khan Deputy Speaker Pu R. Lalrinawma, bialtu MLA ni bawk chuan a hawng. Library thar hawnna inkhawm hi Sihphir Venghlun Community Hall-ah buatsaih a ni a, he hunah hian Art & Culture Director Pu R. Hmingthanzuala chu khualzahawm a ni.

Deputy Speaker chuan tupawhin hmasawnna ruhrel tha kan vengchhungah awm se kan duh vek laiin, heng hmasawnna thil te hi a chhawrtu tur ten kan lo dawnsawn danah a tangkaina chu a innghat chauh thin a ni, a ti a. Raja Rammohan Roy Library Foundation (RRRLF) sum hmanga Library changtlung tak siam a ni chu lawmawm a tih thu leh, veng mipui ten an chhawr tangkai ngei a beisei thu a sawi. Khuallian chuan ram changkang apiangin library an hlut thin thu tarlangin, sum leh pai hausakna chu thawk leh khat a ral mai thei ni mahse zirna leh chhiarzauna in a rahchhuah finna erawh damchhung mi zuitu rohlu a nih thu a sawi a. Lehkhabu kan chhiar zau hian mihring chu a hriatna a tam phah mai bakah nungchang thlengin hmasawnna a thlen thin thu a sawi.

Library hawnna inkhawm a zirlai kalkhawmte chu Pu R. Lalrinawma hian hlawhtlinna sang tak tak an hmuh theih nan taimakna thlah lo turin fuihna thu a sawi a. Kan thiamna hmanga kan chanvo kan hum tlat chuan awlsam takin ram leh hnam kan humhalh mai a ni, tiin zirlaite chu tumruhna nen, nun uluk chungin bei zel turin a chah a. Hnathawh chungchangah pawh thawh duh chin thliar lovin, hna sang leh hna hnuaihnung thliar lova thawh theih apiang kan thawh zel chuan hnathawh tur a van thu kan sawilo ang a, hnamdang ah kan innghah a ngai dawn lo bawk a ni, Deputy Speaker chuan a ti a ni.

Pu R. Hmingthanzuala, Art & Culture Director pawhin thu sawiin, tunlai chhanah electronic media kaltlangin awlsam takin 'information' duh tawk zawnchhuah a hmuh theih tawh mahse, lehkhabu chhiara kan thu hriat hi kan hre rei nge nge a ni, a ti a. Khaw tam takah RRRLF kaltlanga hmun hrang hranga library sakte chu zirlai ten an hmang tangkai thu leh, zirlai mai bakah naupang atanga kum upa thlenga hman tangkai a nih zel a beisei thu a sawi.

RRRLF sum hmang hian Art & Culture Department kaltlangin Mizoramah hmun 90 bawr vel Library sak a ni tawh a. He fund Sorkar laipui leh state sorkar intumsem dan chu 90:10 a ni a, RRRLF kalphungah hian state in a tum ve tur 10% hi sorkar laipuiah a thehluh hmasak phawt a ngai a ni.

Sihphir Venghlun YMA Branch Library hi Multi-Purpose Building sak mek nen building intawm a sak a ni a. Lekhabu 2300 chuang a awm a ni.