Vawiin khan Lawngtlai DC Conference Hall-ah chhiat rupna thlen thulha chet lak dan tur en chhinna (mega mock drill) Lawngtlai khawpui hmun thuma naktuk (November ni 15, 2017)-a buatsaih tur chungchanga hriat tur tul leh thil pawimawhte inhrilh hriatna hun hman a ni.

Vawiina mega mock drill coordination meeting leh table-top exercise neih hi Lawngtlai DRDA Project Director Pu R. Lalremsanga MCS chuan a kaihruai a. Lawngtlaia sawrkar department hrang hrang leh tlawmngai pawl ai awhte kal khawmin, Lawngtlai DM&R Nodal Officer Pu Lalrinawma MCS leh National Disaster Response Force (NDRF), Guwahati-a Assistant Commandant Mr Santosh-a te’n mega mock drill chungchanga hriat tur pawimawhte powerpoint presentation hmangin an sawi fiah a. Mawhphurhna leh tih tur hrang hrang intuk nghal a ni bawk.

Naktuka mega mock drill buatsaih tur hi Lawngtlai District-a tum khat buatsaihna tur a ni a. Lirnghingin chhiatna a thlen anga tih chhin tur niin, chhiatna thlenna hmun atan Lawngtlai DC office, District Hospital leh Don Bosco School te ruahman a ni a. Hemi huna chhiat rupna thlen thulha chhanchhuah hna thawh dan entir turin NDRF Guwahati atangin team an lo kal a. State Disaster Management Authority atangin observer an lo kal bawk a ni.

Attachment

  • Loading attachment...