1693/2023-2024
2023 Thlazing ni 29: Vawiin khan Lawngtlai District Rural Development Office (DRDO) buatsaih, Meri Maati Mera Desh campaign-a naupangte pual intihsiakna lawmman semna, 'Programme on Award Distribution for Children at Amrit Sarovar Site' chu Lawngtlai DC Conference Hall-ah hman a ni a. Lawngtlai Additional Deputy Commissioner Pu Abraham Beirazi Khithie chu Khuallian a ni.


Khuallian Pu Abraham Beirazi Khithie chuan Azadi Ka Amrit Mahotsav lawmna kal zelah Rural Development Department te'n naupangte pual intihsiakna (competition) an buatsaih chu lawmawm a tih thu sawiin, hemi hlawhtlin nana hma latu BDO-te leh staff-te leh village council-te hnenah lawm thu a sawi a. India ram zalenna kum 75-na lawmna kal zel, Azadi Ka Amrit Mahotsav hmawr bawkna 'Meri Maati Mera Desh' campaign leh Amrit Sarovar activity-te chu India ram hmun hrang hranga hman a nih thu sawiin, he thil tum ber chu India rama inremna thlen hi a ni, a ti a, Shilaphalakam – lungphun aṭang te hian ṭhangtharte'n kan zalenna sualtu (freedom fighter)-te an hriat reng theih phah dawn a ni, a ti. Amrit Sarovar Site-a hmanlai infiamna (,traditional games) hmanga intihsiakna buatsaih chu ṭhangtharte'n kan pi leh pute huna infiamna an lo neih ṭhinte an hriat tharna hmanraw ṭangkai tak a ni dawn tih sawiin, he inelnaa tel naupang hlawhtlinna changte chu a lawmpui thu a sawi a; an lehkha zirlai leh infiamna leh taksa hriselna ngai pawimawh turin a fuih nghal a ni.

Hun kaihruaitu Lawngtlai DRDO Project Director Pi Marilyn Rualzakhumthangi chuan AKAM MMMD puala intihsiakna leh lawmman semna hlawhtlin nana Block Level-a BDO leh staff-te leh village council leh vantlang mipuite inpeknaah lawm thu a sawi a. He inelna bakah hian Independence Day 2023 pualin Amrit Sarovar Site hrang hrangah Tiranga Yatra, Cleanliness Pledge, Plantation leh Distribution of Ownership Certificate activity-te hman a nih thu sawiin, Rural Development Department chu Azadi Ka Amrit Mahotsav programme hlawhtlin theih nana a fawng vuantute zinga mi an nih thu a sawi a. RD staff-te chu mipui rawngbawlsaktu an nih anga an rawngbawlsak mipuite nena an inkar a ṭhat a pawimawh thu sawiin, anmahni dawrtute hawihhawm taka lo dawngsawng zel turin staff kal khawmte chu a chah a ni.

Khuallian Pu Abraham Beirazi Khithie chuan lawmman dawngtute hnenah lawmman (certificate leh cash prize) a hlan a. Lawngtlai BDO Pu Collin Hlychho chuan lawm thu sawiin hun a khar a ni.

Bungtlang 'S' RD Block huam chhunga Bungtlang 'S'-I leh Bungtlang 'S'-II Amrit Sarovar hmunahte 'painting/drawing' competition buatsaih niin, Tawngpia s/o Khaisianthang leh Lalnunmawia s/o Lalmalsawma te'n lawmman an dawng a. Sangau RD Block huam chhunga Sangau-II leh Sangau-IV Amrit Sarovar hmunahte 'painting/drawing' competition buatsaih niin, Lalvenhimi d/o H. Lalramzauva leh MC Lalruathlui d/o MC Lalhriatchhunga te'n lawmman an dawng a. Lawngtlai RD Block huam chhunga Hmawngbua 'Insuknawr' buatsaihah HC Lalpianglawma s/o HC Lalhriatpuia chuan lawmman dawngin, Diltlang 'S'-a 'boxing' buatsaihah Lalnunhlua s/o Hmingchungnunga chuan lawmman a dawng a. Chawngte RD Block huam chhunga Kamalanagar-II-a 'high jump' buatsaihah Sonil Bikas Chakma s/o Bimal Kanti Chakma chuan lawmman dawngin, Kamalanagar-IV-a 'painting/drawing' buatsaihah Sona Devi Chakma d/o Chandra Kishor chuan lawmman a dawng a ni.

Attachment

  • Loading attachment...