2995/2023-2024

Lawngtlai dated 11th December 2023: Vawiin chawhnu khan DC Conference Hall, Lawngtlaiah ‘Mizoram Cleanliness Competition 2023’ inbuatsaihna atan a faina leh thianghlimna kawng a Lawngtlai khaw chhung a hmalakna hrang hrang thlirletna hun neih a ni a. Pu Abraham Beirazi Khithie, Addl. DC chuan hun kaihruaiin Pi Margaret J. Vanlalremmawii, DPO chuan hmalakna hrang hrang sawi zauna hun a hmang a. Lawngtlai Town Sanitation Task Force member-te he hun ah hian an tel a ni.

Vawiin thutkhawm ah hian Lawngtlai khaw chhung chu tehfung hrang hrang hmang a tehna ah faina kawng a khawpui thangduang tak a nih thu tarlan niin chu dinhmun hauh chhunzawm tur chuan tha thlah lova Sawrkar leh tlawmngai pawl hrang hrangte tanrual a pawimawh thu sawi a ni a. ‘Mizoram Cleanliness Competition 2023’ atan a inbuatsaihna kalpui a nih piah lam ah faina leh thianghlimna chu khawtlang hrisel leh hmasawn siam nana thil pawimawh tak a nih angin mitinin kan ngaih pawimawh a tul thu Pu Abraham Beirazi Khithie chuan a sawi a ni.

School hrang hrangah school leh a vel tihfaina atan kum tluanin hunbi siam a nih thin dan te, Village Council leh YLA kaltlang a vantlang hmun tihfai hnatlang kalpui a nih thin dan te leh DPO leh LADC hnuai a mumal tak a bawlhhlawh khawnkhawm leh paih kalpui a nih dan te ngaihthlak a ni a. Bawlhhlawh paihna tur ni lova paih lui te hrem dan tur leh fai leh thianghlim zawk a Helipad enkawl dan turte thutkhawmnaah hian rel a ni bawk.