Pang Zirlai Pawl (PZP), Sub-Headquarters Lawngtlai chuan vawiin khan Central YLA Hall, Lawngtlai-III-ah member tharte lawm luhna leh hlawhtlinna changte lawmpuina hun "Freshers' Social cum Felicitation" an buatsaih a. Mizoram sawrkara Deputy Speaker Er Lalrinawma chuan Khual Ropui niin he hun hi a hmanpui.

Khual ropui Er Lalrinawma chuan PZP hun hmannaa khual ropui atana sawm a ni chu lawmawm a tih thu sawiin, hnam zalenna sual kawngah Pang hnam chuan an thawh hlawk hle a, sawi hmaih theih an ni lo, a ti a. Zirlai tharte leh hlawhtlinna chang tharte chu an kum khat thawh rah chu a kum leh atana rin theih a nih loh avangin inthlahdah lova an zirlaite zir chhunzawm zel tur leh nu leh pate'n an phak tawka a tha ber zel an tihsakte lawm taka pawm a, incheina leh nunphungah mahni phak tawk baka lan chhuah tum lo turin a chah.

Hlawhtling turin tum fel tak neih a, mahni zir chin thiam chian a pawimawh tih sawiin, Er Lalrinawma chuan kan chawr chhuahna leh pianphung ni lovin kan rilru puthmang hi a pawimawh a, mi theih ang chu ka thei ve tih rilru kan pu tlat tur a ni, a ti a. Ram leh hnam, khawtlang leh chhungkua runtu HIV/AIDS dona hmanraw tha ber chu mahni invawn thianghlim tlat hi a ni tih sawiin, hnam ropui ni turin mahni hnam ziarang leh tih phung chawi nun a, vawn that tlat a pawimawh a, kan hna thawh leh tih theih a hniam emaw, a sang emaw, neitu thinlung pua thawh a, mahni mawhphurhna hlen hi ram tan a tawk em em a ni, a ti.

Khual zahkai Central Young Lai Association (CYLA) President Pu J. Sangthangpuia pawhin mite ngaihsan hlawh turin mahni hnam zahpui lo va, hnam ziarang vawn nun a pawimawh thu a sawi a. Zirlai kal khawmte chu an nun uluk a, Pathian hre chunga taima taka lehkha zir turin a chah.

Vawiina hun hman hi PZP Vice President Lalbuatsaiha'n kaihruaiin, UPC (NEI) Lawngtlai West District Superintendent Rev. R. Ramthatzawla'n hunserh a hmang a. PZP President Thomas Rosangzuala'n kal khawmte lawmna thu sawiin, Secretary K. Hmingthanzuala'n report a pe a. Lai Autonomous District Council (LADC)-a Executive Member i/c Primary School Pu C. Lalneihkhuma, PZP General Headquarters President Herbert Ramengmawia leh Lai Students' Association (LSA) ai awh te'n thu an sawi a. Zirlai hlawhtlinna changte chawimawina leh lawmpuina hun hman a nih bakah, zai leh lam te ngaihthlaka thlir ho a ni bawk.

PZP hian unit 12 neiin, Sub-Headquarters 5 leh Joint Headquarters 1 an nei a. Lawngtlai Sub-Headquarters hnuaiah hian member 176 an awm mek a ni. Vawiina zirlai hlawhtlinna chang lawmpuina an pekte hi HSLC-ah 10 leh HSSLC-ah 4 an ni a. Chawhnu lamah Malaria leh Child Protection chungchang awareness campaign buatsaih zui a ni bawk.