Lunglei District Sports Committee buatsaihin vawiin khan Lunglei District atanga India ram pum huap Infiamna kawng hrang hranga mi hmingtha 17 te chawimawina  hun Cultural Heritage Centre Lungleiah neih a ni a, Pu Lawmawma Tochhawng, Vice Chairman, High Power Committee Lunglei chuan khuallian niin a hmanpui.  

He hun hi LDSC Vice Chairman KC Lalruatkiman a kaihruai a, khuallian HPC Vice Chairman chuan thu sawiin Infiammite tan mahni inhneh chu thil pawimawh tak a ni tiin Infiamna chi hrang hrang pawl hruaitute pawhin hun hman dik leh inthununna tha neih a tul bakah pawl chak leh tha ni tur chuan inthurualna, thawh hona tha leh inunauna tha neih a pawimawh thu a sawi a. Pu Lawmawma chuan infiamna kawng hrang hranga inelna buatsaih thuhlaah midang pur buai lova intodelh a tul thu sawiin pawl leh company emaw thawhpui thiam a, a tul anga indawm kan tawn pui tur dap thiam a pawimawh thu a sawi bawk.  Lunglei District atanga India ram pum huap infiamnaa ti tha bik chawimawi tur an awm chu hmasawnna ropui tak a nih thu sawiin hmalam hun engtak an neihte chu hmang tangkai a, zuih ral lo tura theih tawp chhuah a, taimakna leh tumruhna nen hmalam pan zel turin infiammi kalkhawmte chu a chah bawk a ni. 

He huna khual zahawm Pi C. Lalremruati MIS, DI&PRO pawhin infiammite fuihna thu sawiin, tun tuma chawimawina buatsaih chuan hun kal leh zel turah thalaite phurna leh tumruhna nasa zawk a thlen a beisei thu a sawi a, chawimawina dawngte pawhin an thalai puite a tha zawnga kaihruai tura tan la zel turin a chah bakah eng kawng zawh tur pawhin Zirna a pawimawh thu a sawi a ni.

Vawiina chawimawite hi Sport Discipline hrang hrang Boxing, Shooting, Judo leh Karate bakah Sepaktakro atangte a National level a medal la, Lunglei District chhung a mite  an ni a, chawimawina thuziak leh pawisa fai hlan an ni.