Vawiin khan Lawngtlai DC Conference Hall-ah Mizoram Planning & Programme Implementation Department hnuaia din, Mizoram Entreprenuership Development & Monitoring Committee (MEDMOC) hma lakna Entreprenuership Development Scheme (EDS) chungchang inzirtirna leh Mizoram Kailawn 2019 kalpui mek chungchang inhrilhfiahna hun (outreach programme) hman a ni.

He hun hi Lawngtlai Bawrhsap Pi Shashanka Ala, IAS chuan kaihruaiin, kal khawmte lawmna thu a sawi a. Sumdawnna bul tan chungchanga presentation a buatsaih chu entirin, zirlai kal khawmte chu mi harsatna su kiang tura an ngaihtuahna hmang a, chumi atanga sumdawnna kawng thar zawng tur leh puitlingte chu he lam hawi zawnga tu leh fate fuih phur thin turin a chah.

He hunah hian MEDMOC Master Trainer Pu Ramnundanga chuan EDS awmzia leh a hnuaia hma lakna tur hma chhawp hrang hrangte sawi fiahin, Mizoram hma sawnna tur kailawn pawimawh tak a nih thu a sawi a. Sumdawnna kawnga hlawhtling leh dingchang tura thil pawimawh hrang hrang te, EDS hnuaia a ngaihna hriate tana hamthatna hrang hrang awm thei tur te a sawi fiah bawk.

Indian Institute of Management Calcutta Innovation Park (IIMCIP) partner, Mizoram Consultancy Group ai awh Pi Esther Khiangte chuan EDS hnuaia Mizoram Kailawn 2019 kalpui mek chungchang leh tel ve tura tih dan tur te a sawi fiah a. Mizoram Kailawn chu Mizoramin hmasawnna kawng thar a zawh theihna tura ruahman, eizawnna tur thil thar chin chhuah tur hria leh kawng sial duh mite tana suangtuahna puitlin theihna tur hun remchang, bawhpelh phal chi loh a ni, a ti.

Mizoram Kailawn 2019 hi a tum thumna niin, sumdawnna kawng thar ruahmanna tha neite inelna tur a ni a. Hetah hian hma lakna hlawk leh awmze nei tura ngaihte ruahmanna theh lutin, chu chu mi thiamte’n a tha tha thlang chhuakin, sawrkar chuan an bul tanna tur lawmman a siamsak dawn a ni. Hemia tel duh leh ruahmanna theh lut ve duh tan www.mizoramkailawn.org-ah internet kal tlanga inziah luh theih a ni a. Ruahmanna hi July ni 17 atanga August ni 9, 2019 thleng theh luh theih niin, mi thiamte’n an thlit fim hnuah September ni 6-ah result puan a ni ang a. A tlingte hrual zuina bootcamp hi September ni 16 kar hian buatsaih a ni ang a. September ni 23 bawrah Entrepreneurship Summit neih tur niin, hetah hian lawmman pawh sem nghal a ni ang.

Vawiina outreach programme-ah hian Lawngtlaia mahni remhriatna hmanga sumdawnna kalpui tawh leh bul tan chho mekte, college zirlaite leh line department official-te kal khawmin, thu sawi ngaihthlak bakah hian sawi hona leh zawhna leh chhanna hun hman a ni bawk.