Sawrkarin mipui hnena 'service' a pek chhuah thinte hun bi tiam chhunga a diltu hnena pek chhuah zat zatna tur dan, The Mizoram Right to Public Services Act (MRTPSA), 2015 chungchang zir hona chu vawiin khan Lawngtlai DC Conference Hall-ah District Information & Public Relations Department huaihawtin buatsaih a ni.

He hun kaihruaitu MJA Lawngtlai District Vice President Pu Lalngheta Ralte chuan sawrkar chu mipui vanga awm a ni tiin, mipui tana thawktu sawrkarin dik taka hna an thawh leh thawh loh chu mipui lamin an ngaihven peih a tul thu a sawi a. Mipui hmakhua ngaia sawrkarin ruahmanna a siamte a nih dan tur taka kalpui a nih leh nih lohvah a neitu mipuite'n mawhphurhna lian tak an nei a, an dikna chanvo, danin a pekte humhim turin tan lak zual a ngai a ni, a ti.

District level awareness campaign on the Mizoram Right to Public Services Act, 2015-ah hian Lawngtlai DIPRO Pu C. Lalhruaitluanga, MIS chuan powerpoint presentation hmangin he Dan chungchang hi kal khawmte a zirtir a. He Dan hi December ni 1, 2015 atanga hman tan a nih thu leh tun dinhmunah Mizoram sawrkar chuan department paruk - Transport, Taxation, Social Welfare, Rural Development, Finance leh PHE Department hnuaia service 46 chu he Dan chhungah hian a seng luh tawh thu sawiin, mipui lamin sawrkara an mamawh an dilte a nih dan tur taka hun bi tiam chhunga pek chhuah a nih theih nana sawrkar lam leh mipui lam tih tur te, dan anga thil kalpui a nih lohva zualko theihna turte chiang takin kal khawmte a hrilhfiah a. Hriat chian duh neite tan www.dpar.mizoram.gov.in-ah he Dan hi download theih a nih thu pawh a tar lang .

He hunah hian he Danin a huam chhunga hma lakna kalpui mektu sawrkar department lam official-te, tlawmngai pawl hrang hrang ai awhte, DIET Lawngtlai leh GRHSS-a zirlai leh zirtirtute leh chanchinbu mite an tel a. Zawhna leh chhanna hun hawn a nih bakah, zaithiamte zai ngaihthlak a ni bawk.