Vawiin khan National Health Mission, Health & Family Welfare Department leh Registration of Births & Deaths, Economics & Statistics Department tawngkawpin Naupiang leh Mitthi Record felfai zawk neih dan tur chungchangah Medical Officer-te tan Health Directorate Conference Hall-ah ‘Training on Civil Registration for Medical Certification of Causes of Deaths’ an buatsaih.

Training hi Dr.Eric Zomawia, Mission Director, NHM-in kaihruaiin Medical Officer-te lawmna thu leh presentation hun a hmang a. Civil Registration tih theihna turin sorkar hospital 88-ah leh private hospital 22-ah Registration of Births & Deaths Unit thar hawn a ni a, heng damdawi in 110-a Civil Registration kalpuina sum mamawh hi National Health Mission atangin sum pek thin a ni, a ti. Cancer Registry chungchnag leh cancer vanga thite ‘coding’ dik tak pek a tulzia leh Mizoram-ah cancer natna incidence rate sanzia a sawi bawk.

Damdawi ina mitthi zawng zawngte an thih chhan dik tak - International Classification of Diseases-10 Edition anga records, reports leh certificarte pek an nih theih nan Medical Certification of Causes of Deaths chungchangah Dr.Zorinsangi, State Nodal Officer (Training)-in zirtirna a pe a. National Health Mission hnuaia ‘Health Management Information System’ (HMIS) hnuaia Civil Registration kalpui dan chungchang zirho a ni bawk. Inah emaw Sub-Centre-ah emaw naupiang, thi saa piang leh mitthi awmte kim taka report a nih theih nana ruahmanna an siam kalpui mek leh HMIS Monthly format thar Data Items chungchangah Pu C.Vanlalsiamthara, Consultant HMIS-in zirtirna a pe bawk a ni.

He Training-ah hian Economics & Statistics Department-in Civil Registration - Registration of Births & Deaths a kalpui dan zirho a nih bakah ‘Physician’s Manual on Medical Certification of Causes of Deaths’ chu Medical Officer-te hnenah hian sem a ni bawk.

Sorkar laipui hnuaia Ministry of Health & Family Welfare leh Registration of Births & Deaths te duhdan angin Naupiang, stillbirth (thisaa piang) leh mitthi zawng zawngte kim taka report an nih theih nan leh naupiang leh mitthi zawng zawngte Certificate pek an nih theih nan ASHA-te tan pawh hamthatna a duang tel a. In (home)-ah emaw Sub Centre-ah emaw nau piang, stillbirth leh mitthi an awmin ASHA-in an vengchhunga Registration of Births & Deaths hnenah leh Sub Centre-a Health Worker-te hnena an report an pekin naupiang pakhatah emaw, thisaa piang emaw leh mitthi emaw report pakhat zel manah Rs.100/- dawng thei tura lawmman siam sak an ni.