No.5165/2020-2021

Lawngtlai, Mimkut thla ni 17, 2020: Mizoram State Transport Authority (STA)-in Mizoram puma inang tlang leh rualkhai zawka auto rickshaw leh taxi hman man (fare) siam tura hma a laknaah District hrang hrangin an duh dan rawtna thlen tura a tih angin, vawiin khan Lawngtlai Bawrhsap Dr Andrew H. Vanlaldika, MCS hovin DC Conference Hall-ah Lawngtlai District-in STA-a rawtna a thlen tur chu ngaihtuah ho a ni.

Bawrhsap chuan auto rickshaw leh taxi hman man chu mi rethei ber berte nghawng pha a nih avangin ngun taka ngaihtuahna seng turin member kal khawmte chu a chah a. Meeting thu tlukna chu hman nghal tur ni lovin, Lawngtlai District rawtna anga STA-a thlen tur chauh a ni a, district hrang hrang atanga rawtna lut hmangin STA chuan thu tlukna a la siam leh dawn a ni, a ti.

He hunah hian Addl SP, District Transport Officer leh District Council Transport Officer (LADC) bakah, Lawngtlai Auto Rickshaw Owners' & Drivers' Association (LARODA), Mizoram Govt Drivers' Association (MGDA) leh tlawmngai pawl dang ai awhte an tel a. DTO Pu V. Lalruatliana, MCS chuan rate hman lai (STA approved rate) mila ruahmanna an lo siam sa chu pharhin, thlir ho a ni a. Auto rickshaw leh taxi neitu leh khalhtute tana hloh awm lo tur leh mipuite tan pawha na lo tur ngunthluk taka ngaihtuah a nih hnuah, STA duh dan angin a kilometre bi-a auto rickshaw leh taxi hman man atana rawtna thlen tur chu pawm a ni.