Vawiin khan Lawngtlai DC Conference Hall-ah Election Expenditure Observer Pu Pema Tshering Bhutia IRS hovin Lawngtlai District chhunga assembly constituency pathuma MLA candidate-te'n campaign sensova an sum hman (expenditure) chhinchhiah dan a felfai leh felfai loh endik niin, expenditure monitoring team chhinchhiah dan nen enmil a ni.

Vawiina 1st inspection neihah hian Asst Expenditure Observer pathumte leh accounting team member-te pawh an tel a. Lawngtlai District chhunga constituency pathuma candidate-te tana Additional Agent for Expenditure-te'n an account bu an ken khawm chu endik niin, accounting team-te'n shadow observation register an vawnte nen a inmil em tih enfiah a, siam rem ngaite siam rem a ni a. Felfai zawka account bu enkawl dan tur inhrilh thar leh a ni bawk. Sum hman dana thil fel lo leh rinhlelhawm erawh hmuh a ni lo.