Mizoram Chief Electoral Officer Ashish Kundra chuan vawiin khan Kanhmun khua a Temporary Polling Station 15 hmun turte leh temporary polling station sak mek te a enfiah.

Mizoram Chief Electoral Officer Ashish Kundra chuan Reang (Bru) Tripura camp-a awm Mizoram Electoral Roll-a hming chuang ten Mizoram MLA inthlanpui a vote an thlak theihna tur a Kanhmun khua a Temporary Polling Station 15 sak lai mek te leh security awmna tur hmun a enfiah a, Kanhmun Tourist Lodge-ah Mamit DC, North Tripura DM, North Tripura SP leh Kanhmun khawtlang hruaitute, Zirlai pawl aiawh leh Kohhran hruaitute nen inkawm hona an nei nghal a ni.

Chief Electiral Officer chuan Kanhmun khawtlang hruaitute chu MLA inthlan tluang taka a kal theih nan thawhpuiah a sawm a, National issue anih vangin Kanhmun NGO te chu mawhphurhna sang tak an nei ani tih hria-a theihtawp chhuah a tan lo la turin a ngen a ni. Kanhmun khawtlang hruaitute te chuan Reang(Bru) Tripura Camp atanga vote thlak tur a lokal te chu thinlung tak a an lo lawm tur thu leh an mahni lo lawm nan Mizoram chinah welcome gate lo siam an tum thu an sawi ve bawk a ni.

Vawiin inkawm hona-ah hian Reang(Bru) Tripura camp atanga Kanhmun khua-a vote thlak tura an rawn kalna motor te chuan Mizoram leh Tripura inrina thleng arawn thlah anga heta trang hian an vote thlakna tur hmun ahnaih tawh tho avangin ke in an kal ang. CEO chuan vote thlak turte tan voter ID slip chu inthlan ni (election day) hma ni 3 ah pek chhuah vek nise a duh thu a sawi.

Bru Tripura Camp-ah hian Mizoram khua leh tui, Mizoram Assembly Constituency 9 a Electoral roll a hming chuang (vote nei) mi 11968 an awm mek a, Election Commission of India in Bru Tripura Camp-a awm ten Mizoram chhungah ngei vote an thlak tur a ni, a tih angin tun thla ni 28 a MLA inthlan a vote an thlak theihna turin Kanhmun khuaah temporary polling station sak mek a ni a, Tripura Bru Camp ah hian Mizoram Constituency 9 a mi an awm avangin an vote thlakna tur temporary polling station 15 siam a ngai a, Kanhmun khelmual (Field) ah Mamit district constituency 3 te tan polling station 9 leh Indoors stadium-ah Kolasib district leh Lunglei district constituency te tan polling station 3 ve ve ruahman a ni. Kanhmun hi ramri dep a awm anih vang leh Bru Tripura camp a mi te vote thlakna tur anih avang hian venhimna thazawka pek an nih theihnan CAPF company 2 (200 people vel) leh SAPF mi 30 vel duty tur a ruahman a ni a, security duty tur te hi Kanhmun Bazar chung leh Kanhmun YMA Hall-ah te an awm dawn a ni.

Kanhmun tourist lodge a meeting zawh hian CEO team te chuan Bru Tripura camp Naisingpara ah a kal leh dawn a ni.

Mizoram CEO Ashish Kundra hi SPNO/IGP (Hqrs) Neeraj Thakur, Addl CEO Krishna Mohan Uppu leh Dy CEO H Lianzela te bakah Mamit District Election Observer pathum, District Election Officer leh SP Mamit te'n an tawiawm a ni.