1557/2023-2024

2023 Thlazing ni 17: Mizoram State Legislative Assembly Inthlanpui 2023 atana inbuatsaihna kal mekah vawiin khan Lawngtlai DC Conference Hall-ah inthlan kaihhnawiha mawhphurhna hrang hrang neite chu Lawngtlai District Election Officer Pu H. Lalhmingthanga hovin an ṭhu khawm a. Inthlan kaihhnawiha inbuatsaihna kalpui mek leh hmachhawp te an thlir ho.

District Election Officer Pu H. Lalhmingthanga chuan August 29-31, 2023 hian Election Commission of India (ECI) hotute'n Aizawl an rawn tlawh dawn thu leh Lawngtlai District-a hma laknate chipchiar taka thlen a ngaih thu a sawi a. Election chu District Election Office-a mite tan chauh buaipui theih a ni lo tih sawiin, inthlanna dik, felfai leh thianghlim nei turin mawhphurhna neite'n ṭha taka an hlen chhuah a ngai a ni, a ti a. Sawrkar, political party, tlawmngai pawl leh mipui ṭan hona ṭha tak a pawimawh tih sawiin, chuti ang thawh hona nei tur chuan a sawm a ni.

He hunah hian Lawngtlai Superintendent of Police Pu Lokeshwaran R. bakah, Nodal Officer leh Sector Officer-te, thu ngaihtuah kaihhnawiha mawhphurtu LADC leh state sawrkar department hotute an tel a. Polling booth thuam ṭhat dan tur te, venhimna lam te, inkal pawhna kawng leh mipuite'n ṭha taka vote an thlak theih nana tih tur pawimawh hrang hrangte an sawi ho a ni.

Lawngtlai District-a Assembly Constituency pathum - Tuichawng, Lawngtlai West leh Lawngtlai East-ahte polling station 181 a awm a. Lawngtlai District huam chhung hi sector 26-ah ṭhen niin, sector tin vil tur sector officer-te ruat fel an ni tawh a. Sector officer-te hian an huam chhunga tih tur pawimawhte an thawk ṭan chho mek tih he hunah hian sawi lan a ni.

Vawiin ṭhut khawmah hian a bikin Tuichawng leh Lawngtlai West-a inkal pawhna harsat zualna laite siam ṭhat a nih theih nana hma lakna tur hrang hrang duan a ni a. Inthlanna tluang taka neih a nih theih nana buaipui hmasak ngaite, a mawhphurtu department hrang hrangte'n an bawhzui tur ruahman a ni bawk.