1556/2023-2024

Aizawl, the 17th August,2023 : Vawiin khan Chanmari YMA Hall ah National Mental Health Programme (NMHP), National Programme for Health Care of Elderly (NPHCE), National Health Mission (NHM), Health & Family Welfare Department Mizoram leh Alzheimer's and Related Disorders Society of India (ARDSI) Mizoram Chapter tangkawp chuan kum upate pualin Free Clinic an buatsaih a. He hunah hian mi 100 an rawn inentir a ni.

He hun hi Dr. Eric Zomawia, Managing Director, National Health Mission (NHM) chuan a hmanpui a. "Hrisel tak leh harh vang taka dam rei" tih thupuia hmangin district tina Health and Wellness Centre awm thu leh heng hmunah te hian mi thiam rawn theih reng an nih thu a puangzar.

Rilru lam harsatna neite tan TeleMANAS helpline 14416-ah engtik lai pawha biak rawn theih an nih thu a sawi a. He helpline din tirh atanga 31 July, 2023 thleng khan phone call hmanga tanpuina diltu mi 2853 an tlin tawh thu a tarlang a ni. Rilru leh a kaihhnawih lama harsatna tawkte pawhin tanpuina zawn kawngah kan bengvar sawt nia a hriat thu a sawi a. Hetiang lam harsatna nei ten in zep mai lova mithiamte biak rawn nachang an hriat a pawimawh zia uar takin a sawi bawk a ni.

Pu Vanneihtluanga, ARDSI-Mizoram Chapter President chuan kum upate tana mahni induat thiam pawimawh zia te leh inpawm thiam a pawimawh zia te a sawi a. Kum upatna in a ken tel harsatna chi hrang hrang tawkte tan ARDSI, Mizoram Chapter helpline ah tanpuina dil theih reng a nih thu a sawi bawk.